پتور میں نابالغ لڑکی کے ساتھ جنسی ہراسانی کا معاملہ - پی ای ڈائریکٹر گرفتار ۔۔۔۔( مینگلور اور اطراف کی مختصر خبریں)
پتور27/ اکتوبر (ایس او نیوز) ایک پرائیویٹ کالج میں فزیکل ایجوکیشن (پی ای) ڈائرکٹر کی خدمات انجام دینے والے ایلیاز پنٹو کو نابالغ لڑکی کے ساتھ جنسی ہراسانی معاملہ میں 15 دن کے لئے عدالتی حراست میں بھیج دیا گیا ہے۔
ذرائع سے ملی اطلاع کے مطابق شہر کے ایک باوقار تعلیمی ادارے میں زیر تعلیم مڈیکیرے سے تعلق رکھنے والی پی یو فرسٹ ایئر کی طالبہ نے 23 اکتوبر کو ویمنس پولیس اسٹیشن میں ملزم پنٹو کے خلاف جنسی ہراسانی کی شکایت درج کروائی تھی ۔ جس کے بعد پولیس نے کارروائی کرتے ہوئے پتورکلب کے پاس سے ملزم پنٹو کو گرفتار کرکے عدالت میں پیش کیا، جہاں سے اس کو عدالتی حراست میں بھیج دیا گیا ۔ پتہ چلا ہے کہ ملزم کی ضمانت عرضی خارج ہونے کے بعد اس کے وکیل نے ریگولر ضمانت کے لئے عدالت میں عرضی داخل کی ہے ۔
منگلورو: عصمت دری کے الزام میں موبائل شاپ کا مالک ہوا گرفتار
منگلورو،27/ اکتوبر (ایس او نیوز) موبائل دکان پر سِم لینے کے لئے گئی لڑکی کو اپنے جال پھانس کر عصمت دری کرنے کی شکایت موصول ہونے پر پولیس نے دکاندار کے خلاف کیس درج کرتے ہوئے ملزم کو گرفتار کرلیا ہے۔
بتایا جاتا ہے کہ سورتکل پولیس اسٹیشن میں ایک لڑکی نے شکایت درج کروائی کہ وہ منا عرف ابراہیم کی دکان پر سم لینے کے لئے گئی تھی ۔ اس کے بعد دکاندار نے اپنی شناخت چھپاتے ہوئے اس کے ساتھ رابطہ قائم کیا اور عشق ہوجانے کا ڈرامہ کیا اور اسے اعتماد میں لینے کے بعد ایک لاڈج میں لے جا کر اس کی عصمت دری کی ۔ پولیس نے اس شکایت پر کاروائی کرتے ہوئے ملزم کو گرفتار کرکے عدالت میں پیش کیا جہاں سے اس کو عدالتی حراست میں بھیجا گیا ہے۔
اڈپی : پوکسو عدالت نے ملزم کو دی 10 سال قید بامشقت کی سزا
اڈپی،27/ اکتوبر (ایس او نیوز) پوکسو معاملات کے سلسلے میں فاسٹ ٹریک کورٹ کی ذمہ داری نبھانے والے ڈسٹرکٹ ایڈیشنل اینڈ سیشنس کورٹ نے نابالغ بچی کے ساتھ جنسی ہراسانی معاملہ کے ملزم بنگلورو کے وینکٹیش (30 سال) کو دس سال قید بامشقت کی سزا سنائی ۔
وینکٹیش پر الزام تھا کہ اس نے اپنے پڑوس میں کھیل رہی پانچ سالہ بچی کے ساتھ جنسی ہراسانی کی ہے پوکسو عدالت کی جج یرمال کلپنا نے اس معاملہ کی شنوائی کے بعد وینکٹیش کو مجرم قرار دیتے ہوئے اسے دس سال کی قید کے علاوہ 20 ہزار روپے جرمانہ کی سزا سنائی ۔ جس میں سے 15 ہزار روپے اور سرکاری فنڈ سے 75 ہزار روپے متاثرہ بچی کو ادا کرنے کے احکامات جاری کیے ۔
خیال رہے کہ یہ معاملہ 2018 میں کارکلا پولیس اسٹیشن کے حدود میں پیش آیا تھا ۔
بنٹوال میں بی جے پی لیڈر پرکاش پر حملہ
بنٹوال،27/ اکتوبر (ایس او نیوز) بیلّور میں بی جے پی لیڈر پرکاش کے گھر میں گھس کر حملہ کرنے کی واردات پیش آئی ہے۔ ذرائع سے ملی اطلاع کے مطابق یہ واردات 26 اکتوبر کی رات میں پیش آئی جب چند لوگوں نے پرکاش پر حملہ کیا جس میں اس کے سر پر چوٹ آئی ہے اور اسے علاج کے لئے ہاسپٹل میں داخل کیا گیا ہے ۔
ذرائع کا کہنا ہے کہ تاحال حملہ کی کوئی وجہ سامنے نہیں آئی ہے ۔ گمان یہ ہے کہ اس حملہ میں مقامی لوگوں کا ہی ہاتھ ہے ۔ دعویٰ یہ کیا جارہا ہے کہ نتین بڈاگے بیلور، نشانت بڈاگے بیلور اور پون کمڈیل وغیرہ گھر میں گھس کر حملہ کرنے والوں میں شامل تھے ۔ جس کے پیچھے ذاتی اسباب ہوسکتے ہیں ۔ بنٹوال پولیس معاملہ کی جانچ کر رہی ہے ۔