پتور 22/ اکتوبر (ایس او نیوز) دلت طبقہ سے تعلق رکھنے والی نابالغ لڑکی کی عصمت دری میں ملوث بی جے پی لیڈر کی گرفتاری کا مطالبہ کرتے ہوئے دلت تنظیموں کی کوآرڈینیشن کمیٹی نے پتور مضافاتی پولیس اسٹیشن کے روبرو ایک زبردست احتجاجی مظاہرہ منعقد کیا ۔

مظاہرین ڈربے سرکل کے پاس سے پیدل مارچ کرتے ہوئے مضافاتی پولیس اسٹیشن کے پاس پہنچے ۔ احتجاجی مظاہرے کے دوران عصمت دری میں ملوث ملزم کو تا حال گرفتار نہ کرنے اور اس کو بچانے کی کوشش کے خلاف نعرے بازی کی گئی ۔

اس موقع پر موگیرا سنگھا کے ریاستی صدر وشواناتھ بنگلورو نے کہا کہ عصمت دری کے اس واقعہ کو ڈیڑھ مہینہ سے زیادہ کا عرصہ بیت گیا ہے مگر مظلوم لڑکی کو ابھی تک انصاف نہیں ملا ہے ۔ اتنا وقت گزرنے کے باوجود پولیس نے تاحال اصل ملزم کے خلاف کے کیس درج نہیں کیا ہے ۔ بلکہ متاثرہ لڑکی کے بیان کو توڑ مروڑ کرمتاثرہ لڑکی کے بڑے بھائی کو ہی گرفتار کیا ہے ۔ جبکہ اصل مجرم آر ایس ایس اور بی جے پی کا لیڈر ہے ۔ 

وشواناتھ  نے وارننگ دیتے ہوئے کہا اگر اصل مجرم کو پکڑا نہیں گیا تو پھر ریاستی سطح پر زبردست احتجاجی مظاہرہ کیا جائے گا ۔ انہوں نے پولیس اور میڈیکل آفیسر پر اس معاملہ کے اصل حقائق چھپانے کا بھی الزام لگاتے ہوئے کہا کہ سیاسی لیڈران بھی مجرموں کو پشت پناہی کررہے ہیں ۔
    
کو آرڈینیشن کمیٹی کے کنوینر رمیش کوٹیان، ڈسٹرکٹ آرگنائزنگ کنوینر آنند میٹابیل نے بھی خطاب کیا ۔

اس اجلاس میں  جئے پرکاش کانیاڈی، اشوک کونچاڈی، سیتارام کونچاڈی، سیسپّا بدراکوڈو کے علاوہ مختلف دلت تنظیموں کے عہدیداران اور اراکین موجود تھے ۔