پتور6/جولائی (ایس او نیوز) بی جے پی کے طلبہ تنظیم اکھل بھارتیہ ودیارتھی پریشد کے ریاستی نائب صدر روہیناکشا شیرالالو نے اخباری کانفرنس کے ذریعے گینگ ریپ کے سلسلے میں گرفتار کیے گئے طالب علموں کا تعلق اے بی وی پی سے ہونے کی تردید کی ہے۔

پیشے کے اعتبار سے لیکچرار مسٹر شیرالالو نے کہا طالبہ کی اجتماعی آبروریزی اور اس کی ویڈیو کلپ سوشیل میڈیا پر اپ لوڈ کرنے کے معاملے میں جن طلبہ کو گرفتار کیا گیا ہے وہ اے بی وی پی سے کوئی تعلق نہیں رکھتے۔مگر انہیں اس تنظیم کاممبر بتاکر اے بی وی پی کو بدنام کرنے کے لئے میڈیا میں مسلسل ایک مہم چلائی جارہی ہے۔ انہوں نے کہا کہ ”ویویکانندا کالج کیمپس میں 8ہزار طلبہ موجود ہیں اور ان میں سے 3ہزار طلبہ اے بی وی پی کے ممبر ہیں۔ بقیہ طلبہ اس تنظیم کے ارکان میں شامل نہیں ہیں۔“انہوں نے اے بی وی پی کو بدنام کرنے کی کوشش کی مذمت کرتے ہوئے عصمت دری کے ملزمین کے لئے سخت سے سخت سزا  کا مطالبہ کیا اور کہاکہ ضلع جنوبی کینرا کے ہر تعلقہ میں 6جولائی کو اس کے خلاف احتجاجی مظاہرہ کیا جائے گا۔