منگلورو 21/نومبر (ایس او نیوز) پتور میں آدھی رات کو جو وحشتناک دوہرا قتل ہواتھا اور ایک بزرگ خاتون سنگین طور پر زخمی ہوگئی تھیں، اس معاملے کو جنوبی کینرا پولیس نے بڑی سرعت دکھاتے ہوئے 24گھنٹوں کے اندر حل کردیا اور ملزم کریم خان کو گرفتار کرنے میں کامیاب ہوگئی۔
پولیس کے بیان کے مطابق کوگّو صاحب کے گھروالوں کے لئے کٹھا تھاروکا رہنے والا کریم خان ایک جان پہچان والا شخص تھا۔ وہ چوری کی نیت سے چھت کے کھپریل اتارکر رات 11بجے کے قریب کوگّو صاحب کے گھر میں داخل ہواتھا۔ جب وہ نقدی اور زیور چراکر جانے کی تیاری میں تھا تو گھر کے لوگ جاگ پڑے۔ چونکہ گھر والوں نے چوری کرتے ہوئے اسے پہچان لیا تھااس لئے اس نے وہاں پر موجودشیخ کوگّو صاحب (65سال) ان کی نواسی سمیحہ بانو(15سال) اور خدیجہ بی (55سال) پر قاتلانہ حملہ کیا۔اس حملے میں کوگّو صاحب اور سمیحہ موقع پر ہی ہلاک ہوگئے تھے۔ جبکہ خدیجہ بی ابھی بھی اسپتال میں زندگی اور موت کی کیفیت سے دوچار ہے۔پولیس کا کہنا ہے کہ کریم خان اور کوگّو صاحب کے درمیان کسی مالی لین دین کے تعلق سے پہلے سے تکرار چل رہی تھی۔
کریم خان اپنی دانست میں گھر کے تمام افراد کو قتل کرنے کے بعد30گرام سونے کے زیورات اور نقد 6ہزار روپوں پر ہاتھ صاف کرکے وہاں سے نکل گیا۔قتل کی اس واردات کے سامنے آنے پرضلع ایس پی لکشمی پرساد نے تحقیقات کے لئے ایک خصوصی ٹیم تشکیل دی۔اس علاقے میں رات کی بیٹ پر تعینات ایک کانسٹیبل بھیما شینا کی طرف سے کچھ سراغ ملے جس کی بنیاد پر پولیس نے کارروائی کی اور کریم خان کو اپنی گرفت میں لینے میں کامیاب ہوگئی۔پولیس کا کہنا ہے کہ ملزم کے پاس سے قتل میں استعمال کیا گیا دھاردار ہتھیاراورچرایا گیا سونا بر آمد کیا گیاہے۔
پولیس کا کہنا ہے کہ لوٹ اورقتل کے دوران کریم خان کا ہاتھ بھی زخمی ہوا تھا۔ جب وہ اپنے گھر پہنچا اور اس کی بیوی نے اس زخم کے بارے میں پوچھاتو اس نے بتایا کہ گھر آتے وقت راستے پر کسی نے اس پر حملہ کیا تھا۔ پھر وہ ایک پرائیویٹ اسپتال میں علاج کے لئے گیا۔ وہاں سے سرکاری اسپتال میں چلایا گیا۔ لیکن جب او پی ڈی میں ڈیوٹی ڈاکٹر نے بتایا کہ اس کے زخموں پر ٹانکے لگانے ہونگے تو وہ وہاں سے بھی رفو چکر ہوگیاتھا۔