ممبئی، 28؍ مارچ (ایس او نیوز؍ایجنسی)  پنجاب کنگس  نے آئی پی ایل 2022 میں جیت کے ساتھ کھاتہ کھولا ہے۔ ٹیم نے ایک مقابلے میں رائل چیلنجرس بنگلور  کو 5 وکٹ سے شکست دی۔ آر سی بی نے پہلے بلے بازی کرتے   ہوئے 2 وکٹ پر 205 رنوں کا ہمالیائی اسکور کھڑا کیا۔ موجودہ سیزن میں پہلی بار کسی ٹیم نے 200 رن بنائے، لیکن ٹیم کو جیت نہیں ملی۔ کپتان  فاف ڈوپلیسی نے 88 رنوں کی طوفانی اننگ کھیلی۔ جواب میں پنجاب کنگس نے ہدف کو 19 اوور میں 5 وکٹ پر حاصل کرلیا۔ شکھر دھون اور بھانوکا راج پکشے دونوں نے 43-43 رن بنائے۔ کولکاتا نائٹ رائیڈرس اور دہلی کیپٹلس بھی اپنے اپنے میچ جیت چکے ہیں۔

ہدف کا تعاقب کرنے اتری پنجاب کنگس نے اچھی شروعات کی۔ مینک اگروال اور شکھر دھون نے پہلے وکٹ کے لئے 7.1 اوور میں 71 رن جوڑے۔ مینک اگروال 24 گیندوں پر 32 رن بناکر لیگ اسپنر وانندو ہسارنگا کی گیند پر آوٹ ہوئے۔ انہوں نے 2 چوکے  اور 2 چھکے لگائے ۔ اس کے بعد شکھر دھون  نے 29 گیندوں پر 43 رن بناکر تیز گیند باز ہرشل پٹیل کی گیند پر آوٹ ہوئے۔ انہوں نے 5 چوکے اور ایک چھکا لگایا۔

نمبر-3 پر اترے بھانوکا راج پکشے نے طوفانی اننگ کھیلی۔ انہوں نے 22 گیندوں پر 43 رن بنائے۔ اسٹرائیک ریٹ تقریباً 200 کا رہا۔ دو چوکے اور 4 چھکے لگائے۔ انہیں تیز گیند باز محمد سراج نے آوٹ کیا۔ اس کے بعد میدان پر آئے انگد باوا کو محمد سراج نے پہلی ہی گیند پر ایل بی ڈبلیو آوٹ کیا۔ اس طرح سے اسکور 4 وکٹ پر 139 رن ہوگیا۔

لیام لیونگسٹون نے بھی اچھی اننگ کھیلی۔ انہوں نے 10 گیند پر 19 رن بنائے اور 2 چھکے لگائے۔ انہیں تیز گیند باز آکاش دیپ نے آوٹ کیا۔ ٹیم نے پانچواں وکٹ 156 رنوں کے اسکور پر گنوایا۔ اب 31 گیند پر 50 رن بنانے تھے۔ اس کے بعد شاہ رخ خان اور اوڈین اسمتھ نے ٹیم کو سنبھالا۔ شاہ رخ 20 گیند پر 24 رن اور اسمتھ 8 گیند پر 25 رن بناکر ناٹ آوٹ رہے۔ اسمتھ نے 18ویں اوور میں محمد سراج کی گیند پر تین چھکے اور ایک چوکا لگایا۔