پونے پولیس نے کیا ایم این ایس اراکین کو گرفتار۔ بنگالی مزدوروں کے گھروں پر چھاپہ ماری کا شاخسانہ
پونے 26/فروری (ایس او نیوز) غیر قانونی طور پر ملک میں دراندازی کرنے والے بنگلہ دیشیوں کو ملک بدر کرنے کے نام پر مہاراشٹرا نونرمان سینا نے جو مہم چلائی ہے اس کے منفی اثرات بھی سامنے آنے لگے ہیں۔
جس کی تازہ مثال پونے کا واقعہ ہے جہاں بنگلہ دیشی غیر قانونی گھس پیٹھیوں کی تلاش میں ایم این ایس کی ٹیم نے بالاجی نگر میں واقع بنگالی مزدوروں کے گھروں پر چھاپہ مارا اور تین لوگوں کو پولیس اسٹیشن لے گئی۔وہاں ان بنگالی مزدوروں نے اپنے ہندوستانی شہری ہونے کے ثبوت بھی پیش کیے، اس کے باوجود انہیں شام تک پولیس اسٹیشن میں بٹھاکر رکھا گیا۔بعد میں سہکار نگر پولیس اسٹیشن میں ایک بنگالی مزدور روشن شیخ (43سال)نے ایم این ایس اراکین کے خلاف زبردستی گھر میں گھسنے کی شکایت درج کروائی اور پولیس نے کارروائی کرتے ہوئے ٹیم لیڈر اجئے شیند اور سچن کاٹاکر کوآئی پی سی کی دفعہ 143,147,448 اور 507کے تحت گرفتارکرلیا۔
دراصل 9فروری کو ممبئی میں ایک ریالی سے خطاب کرتے ہوئے ایم این ایس کے چیف راج ٹھاکرے نے پولیس ڈپارٹمنٹ سے مطالبہ کیا تھا کہ بنگلہ دیش سے ہجرت کرکے ہندوستان میں داخل ہونے والے مسلمانوں کو تلاش کرکے ملک بدر کیاجائے ورنہ یہ کام خود ان کی پارٹی ایم این ایس کے کارکنان کریں گے۔اس کے بعد سے ممبئی اور مہاراشٹرا کے دوسرے علاقوں میں ایم این ایس کارکنان کی طرف سے مشکوک مقامات پر چھاپہ ماری کی جارہی ہے۔