بنگلورو،21/نومبر (ایس او نیوز) شہر کی مضافات میں واقع انچے پالیہ علاقہ میں میٹرو اسٹیشن کی مانگ کو لے کر مقامی افراد نے بنگلور- ٹمکور قومی شاہراہ پر دھرنا دیا اور بنگلور میٹرو ریل کارپوریشن لمیٹڈ (بی ایم آر سی ایل) کے خلاف نعرے لگائے- راستہ روکو دھرنے کی وجہ سے اس شاہراہ پر آدھا گھنٹہ تک ٹرافک جام رہا جس سے کئی کلو میٹر تک سواریوں کو قطار میں کھڑے دیکھا گیا- احتجاجی مظاہرین نے بتایا کہ میٹرو ریل کا تعمیری کام انچے پالیہ سے قریب ہورہا ہے- یہاں سے ٹمکور تک میٹرو ریل کی توسیع کا بھی منصوبہ ہے- انہوں نے کہا کہ بی ایم آر سی ایل انچے پالیہ علاقے میں اپنا میٹرو ریل اسٹیشن تعمیر نہیں کررہا ہے- جس سے اس علاقے کے افراد کو کوئی سہولت نہیں ہوگی- انہوں نے بتایا کہ انچے پالیہ علاقے میں میٹرو اسٹیشن کی اشد ضرورت ہے- لیکن بی ایم آر سی ایل نے اس کو نظر انداز کردیا ہے- انہوں نے بتایا کہ پہلے پراجکٹ کے تحت انچے پالیہ سے قریب میٹرو اسٹیشن تعمیر کرنے کی تجویز تھی جس سے مقامی افراد میں کافی خوشی محسوس کی جارہی تھی- انہوں نے بتایا کہ اب اچانک بی ایم آر سی ایل نے انچے پالیہ کے بجائے ینٹنے میل کے پاس اپنا میٹرو اسٹیشن تعمیر کررہا ہے- احتجاجی مظاہرین کا کہنا ہے کہ بی ایم آر سی ایل شری کنٹا پورہ کے پاس ایک اور میٹرو اسٹیشن تعمیر کررہا ہے- یہاں کی آبادی صرف 20ہزار ہے- جبکہ انچے پالیہ میں اس سے بھی کافی زیادہ آبادی ہے- انہوں نے بی ایم آر سی ایل سے مانگ کی کہ وہ فوری انچے پالیہ میں اپنا میٹرو ریل اسٹیشن تعمیر کریں - ورنہ دھرنے کا سلسلہ اسی طرح جاری رہے گا- انہوں نے بتایا کہ اس سلسلہ میں انہوں نے بی ایم آر سی ایل کو یادداشت بھی پیش کی ہے-