بھٹکل:10؍ جنوری (ایس اؤ نیوز) مرکزی حکومت کے شہریت ترمیمی قانون( سی اے سے ) اور این سی آر قوانین کے خلاف جاری ملک گیر احتجاج دن بدن زور پکڑتا جارہاہے۔ لوگ انوکھے انداز اپناتے ہوئے احتجاج کررہے ہیں۔مختلف تنظیموں کی قیادت میں شہروں، گاؤں سمیت کئی بڑے بڑے شہروں میں لگاتار احتجاج جاری ہے اور ہزاروں لوگ شریک ہورہےہیں۔
بھٹکل میں بھی کچھ ہی دن پہلے بہت بڑےپیمانے پر احتجاج ہواتھا۔ شہر میں احتجاج کو جاری رکھنے کےلئے مختلف طریقہ کار کو استعمال کیا جارہاہے۔ خاص کر بھٹکل کے نوجوانوں کے اسپورٹس ادارے ہر سال کھیلے جانے والے ٹورنامنٹوں کو معطل کرچکے ہیں۔ اب یہ آواز گلیوں، سڑکوں سے گزرتے ہوئے گھر گھر پہنچ گئی ہے۔ ایسا ہی انوکھے مناظر اب بھٹکل میں شادی کے جشن میں بھی دیکھنے کو مل رہی ہے۔ عین نکاح کے وقت کچھ نوجوان سی اے اے اور این آر سی کے خلاف پلے کارڈ ہاتھوں میں تھامے نعرہ بازی کرتے ہوئے اپنی آواز بلند کررہے ہیں۔ نکاح کی محفل میں اچانک اس طرح کے واقعات پیش آنے سے گھر والوں سمیت شادی میں شریک مہمانان بھی نعرے بازی میں شامل ہورہے ہیں۔ اس تعلق سے سوشیل میڈیا پر وڈیو کلپس بھی خوب وائرل ہورہی ہے۔