ریاض،19؍مئی(ایس او نیوز؍ایجنسی) سعودی عرب کی معروف کاروباری شخصیت صالح بن عبد الله كامل پیر کے روز 79 برس کی عمر میں فوت ہو گئے۔ وہ طویل عرصے سے اپنی بیماری کا مقابلہ کر رہے تھے۔
صالح عبد الله كامل کا شمار سعودی عرب کے نمایاں ترین کاروباری شخصیات اور سرمایہ کاروں میں ہوتا ہے۔ انہوں نے متعدد سیکٹروں میں سرمایہ کاری کی جن میں اہم ترین انویسٹمنٹ سیکٹر ہے۔ عرب ممالک میں "دلة البركة" گروپ اپنی کثیر سرگرمیوں کے سبب اچھی طرح سے جانا جاتا ہے۔ اس گروپ کے زیر انتظام ترقیاتی سرمایہ کاری سے متعلق ادارے اور کمپنیاں موجود ہیں۔ گروپ کی نمایاں ترین سرگرمیاں اسلامی بینکنگ کے سیکٹر میں ہیں۔
کامل ان سعودی کاروباری شخصیات میں سے ہیں جنہوں نے سب سے پہلے میڈیا کے میدان میں سرمایہ کاری کی۔ اس حوالے سے مشہور عرب ریڈیو اینڈ ٹیلی ویژن کارپوریشن (اے آر ٹی) ایک کامیاب تجربہ رہا۔ وہ سعودی عرب کے ایک جدید ترین اخبار "مکہ" کے بانیوں میں شمار ہوتے ہیں۔ کامل اپنی وفات تک اخبار کے مینجمنٹ بورڈ کے چیئرمین رہے۔
کامل نے جدہ میں ایوان تجارت و صنعت کی صدارت بھی سنبھالی۔ بیرونی سطح پر بھی کامل متعدد تنظیموں اور اداروں کے سربراہ رہے۔ ان میں اسلامی بینکوں اور مالیاتی اداروں کی جنرل کونسل کا مینجمنٹ بورڈ شامل ہے۔ اس کے علاوہ وہ اسلامی ترقیاتی بینک کے صدر کی مشاورتی کمیٹی کے رکن بھی رہے۔
صالح کامل کا شمار سعودی عرب کی دولت مند ترین کاروباری شخصیات میں ہوتا ہے۔ ان کی دولت کا اندازہ 8 ارب ریال (2.3 ارب ڈالر) لگایا گیا ہے۔ وہ بہت سے سیکٹروں اور اقتصادی سرگرمیوں میں مصروف عمل رہے جن میں اسلامی بینکنگ شامل ہے۔ وہ عرب دنیا کی اُن معروف ترین شخصیات میں سے ایک ہیں جو روایتی بینکنگ کو اسلامی بینکنگ میں تبدیل کرنے کی پُر زور داعی شمار ہوتی ہیں۔