منگلورو،24؍ستمبر (ایس او نیوز) معروف عالم دین اور اڈپی ، چکمگلورو ، ہاسن اور شیموگہ جیسے چار اضلاع کے مشترک قاضی کے منصب پر فائز الحاج پی ایم ابراہیم موصلیار بیکل (71سال)کا ایک نجی اسپتال میں انتقال ہوگیا۔

سنی جمعیت العلماء کے ریاستی صدر اور جامعہ سعدیہ عربیہ شریعت کالج کے پرنسپال مرحوم قاضی صاحب عام طور پر ’بیکل استاد‘ کے نام جانے جاتے تھے۔آپ سمستھا علماء یونین کی مرکزی مشاورت کے رکن اور ’الانصار‘ رسالے کے چیف ایڈیٹر بھی تھے۔قاضی صاحب مرحوم دارالعلوم دیو بند سے فارغ تھے، اورگزشتہ  40سال سے زائد عرصے سے  بیکل میں مدرس کی خدمات انجام دے رہے تھے۔اسی وجہ سے وہ بیکل استاد کے نام سے مشہور ہوئے۔ان کی دینی خدمات کے اعتراف کے طور انہیں ’تاج الفقہاء‘ کے خطاب سے نوازا گیا تھا۔