عیدالاضحیٰ میں قربانی سے متعلق جمعیۃ علماء ہند نے جاری کی ایڈوائزری
نئی دہلی،28؍جولائی (ایس او نیوز؍ایجنسی) ملک میں کورونا وائرس کے کیسوں میں ہو رہے اضافے اور ریاستی حکومتوں کے ذریعہ اٹھائے جانے والے اقدامات کے تناظر میں جمعیۃ علماء ہند ہند مولانا ارشد مدنی کی جانب سے عیدالاضحیٰ کو لے کر ایڈوائزری جاری کی گئی ہے۔ دراصل اتر پردیش میں ہفتے میں دو دن سنیچر (ہفتہ) اور اتوار کو لاک ڈاؤن چل رہا ہےجبکہ مدھیہ پردیش جیسی ریاست میں 10 دنوں کے لاک ڈاؤن کا اعلان کیا گیا ہے۔
موجودہ حالات کے تناظر میں جمعیۃ علماء ہند کی طرف سے جاری کردہ ایڈوائزری جاری کرکے کہا گیا ہے کہ وزارت صحت کی جانب سے جاری کی گئی گائیڈ لائن پر عمل کرتے ہوئے مسجدوں اور گھروں میں عید کی نماز ادا کی جائے اور قربانی کی جائے۔ جمعیۃ علماء ہند کی ایڈوائزری میں کہا گیا ہے، مسلمانوں اور خاص طور سے اترپردیش کے مسلمانوں کو مشورہ دیا جاتا ہےکہ وہ ممنوع جانوروں کی قربانی نہ کریں کیونکہ اس کے متبادل کے طور پر کالے جانوروں کی قربانی جائز ہے۔
کسی بھی طرح کی مشکل سے بچنے کےلئےکالےجانور کی قربانی پر اکتفا کیا جائے۔ تاہم اگر کسی علاقے میں شرپسند عناصر کالے جانور کی قربانی سے بھی روکتے ہیں تو پھر علاقے کے ذمہ دار لوگ اور با رسوخ افراد مقامی انتظامیہ کو اعتماد میں لے کر قربانی کریں۔ تاہم جس علاقے میں قربانی ہوتی آئی ہے، وہاں پر بکرے کی قربانی ضرور کی جائے تاکہ مستقبل میں کسی بھی طرح کی مشکل سے بچا جا سکے۔ صفائی کا خاص طور سے خیال رکھا جائے اور قربانی کے باقیات کو کوئی گڑھا کھود کر دفن کر دیا جائے، جس سے کسی کو پریشانی نہ ہو اور بدبو اور تعفن نہ پھیلے۔