منگلورو اور اڈپی ضلع میں نجی اسپتالوں اور ڈاکٹروں کی ایک روزہ ہڑتال۔ سرکاری اسپتالوں میں مریضوں کا ہجوم
منگلورو17/جون (ایس او نیوز) کولکاتہ میں فرائض کی انجام دہی کے دوران ڈاکٹروں پر ہوئے حملے کی مذمت میں انڈین میڈیکل ایسو سی ایشن نے ملک گیر ہڑتال منانے کا جو اعلان کیا تھا اس کے جواب میں اڈپی اور منگلورو میں نجی اسپتالوں اور ڈاکٹروں نے پوری طرح بند منایا۔یہ بند منگل کی صبح 6بجے تک جاری رہے گا۔
دونوں اضلاع کے تمام پرائیویٹ اسپتالوں اور نجی دواخانوں میں سوائے ایمرجنسی کے دیگر تمام خدمات معطل رہیں۔ ہڑتال منارہے ڈاکٹروں نے منگلورو اتاور میں واقع انڈین میڈیکل ایسو سی ایشن کے آڈیٹوریم میں میٹنگ منعقد کی۔منگلورو کے ڈسٹرکٹ وینلاک اور لیڈی گوشن ہاسپٹل میں مریضوں کا تانتا لگا ہواتھا۔ جبکہ کے ایم سی اسپتال منی پال میں او پی ڈی خدمات پوری طرح بندرہیں۔دیگر سرکاری اسپتالوں میں مریضوں کے لئے او پی ڈی کی سہولت فراہم کی جارہی تھی لہٰذا پرائیویٹ اسپتال میں ڈاکٹروں کی غیر موجودگی سے پریشان مریض سرکاری اسپتالوں سے استفادہ کرتے نظر آئے۔
