اڈپی،2؍جون (ایس او نیوز) اڈپی اور منگلورو ضلع میں لاک ڈاؤن کی وجہ سے گزشتہ دو مہینوں سے سڑکوں سے دور رہنے والی پرائیویٹ بسیں اب دوبارہ مسافروں کو ایک جگہ سے دوسری جگہ پہنچانے میں مصروف ہوگئی ہیں۔
ذرائع سے ملی اطلاع کے مطابق اڈپی ضلع میں 25فیصد سروس اور25فیصد سٹی بسیں سڑکوں پر نظر آرہی ہیں۔ ان میں سے بس تھوڑی بسیں ہی اڈپی سے منگلورو تک کا سفر کررہی ہیں۔مگر حیران کن بات یہ ہے کہ ان بسوں میں مسافروں کی طرف سے ایک دوسرے سے مناسب فاصلہ رکھنے کے اصول پر بالکل عمل نہیں ہورہا ہے۔کیونکہ قانون کے مطابق بسوں میں جتنی سیٹوں کی گنجائش ہے اس کے پچاس فیصد جتنے ہی مسافروں کو بسوں میں سوار کیا جانا چاہیے۔لیکن اڈپی اور منگلورو میں دیکھا یہ جارہا ہے کہ پوری کی پوری بس مسافروں سے بھری ہوئی ہے۔ معلوم ہوا ہے کہ ہیجماڈی چیک پوسٹ پر بعض بسوں کو پولیس نے روکا بھی اور کنڈکٹروں کو وارننگ بھی دی ہے۔
دوسری طرف کے ایس آر ٹی سی کی بسوں کو بھی بڑی تعداد میں سڑک پر اتارا گیا ہے۔منگلورو اور اڈپی کے درمیان کافی سرکاری بسیں دوڑتی ہوئی نظر آتی ہیں۔ منگلورو میں پہلے مرحلے کے طور 30تا 35فیصدنجی بسوں کو سڑکوں پراتارا گیا ہے۔صبح او رشام کے اوقات میں بسوں کی تعداد بڑھانے کی بات کہی گئی ہے۔جبکہ 50فیصد سرکاری بسیں مسافروں کے لئے اپنی خدمات دے رہی ہیں۔