بنگلورو،7؍ستمبر (ایس او نیوز) اقلیتوں کی فلاح و بہبودی  کے لئے تشکیل کردہ مرکزی حکومت کی اسکیم "پرائم منسٹرز 15 نکاتی پروگرام" کا ریاست کرناٹک میں زمینی سطح پر نفاذ بالکل  بھی نہ ہونے کی بات سامنے آئی ہے، جس کو لے کر اقلیتوں میں سخت ناراضگی پائی جارہی ہے۔

بتایا جارہا ہے کہ "پرائم منسٹرز 15 نکاتی  پروگرام" اسکیم کے نفاذ کے لئے کوئی خصوصی محکمہ نہیں ہے، تاہم، حکومت کی طرف سے تمام محکموں کو یہ ہدایات دی گئی ہیں کہ وہ اپنے ترقیاتی بجٹ میں سے 15 فیصد کو اقلیتوں  کے لیے مختص کریں۔

واضع رہے کہ اس اسکیم کے نفاذ کے سلسلے میں ریاستی سطح کی ایک کمیٹی ہوتی ہے جس میں سرکاری افسران کے علاوہ عوامی نمائندوں کو بھی شامل کیا جاتا ہے کمیٹی کے تحت  ہر 3 مہینے میں ایک میٹنگ منعقد کی جاتی ہے تاکہ اسکیم کا موئثر طور پر نفاذ کیا جاسکے اور اس کا جائزہ لیا جاسکے، لیکن اقلیتوں کے لیڈران کا کہنا ہے کہ زمینی سطح  اس اسکیم کو نافذ نہیں کیا گیا ہے جس کے نتیجے میں اقلیتوں کو اس اسکیم کا کوئی فائدہ نہیں پہنچ رہا ہے۔