سلطان پور،12/نومبر(ایس او نیوز/ یو این آئی) اترپردیش کے ضلع سلطان پور میں پرائمری اسکولوں کو گود لے کر اسے ماڈل اسکول بنانے کے معاملے میں پورے ملک میں نظیر پیش کرنے کو تیار ہے۔ یہاں کے رکن پارلیمان، ایم ایل اے، سابق وزیر،سابق ایم ایل اے سمیت دیگر لیڈر،وکیل ڈاکٹر،ٹیچر اور سماجی کارکنوں نے بھی اپنے یہاں تعلیمی اداروں کی صورت اور سیرت بدلنے کے لئے ایک ایک اسکول کو گودلیا ہے۔ گورنر آنندی بین پٹیل بدھ کو اس قابل تعریف کام کے لئے ان تمام افراد کی حوصلہ افزائی کریں گی۔

پروگرام کے کوآرڈینیٹر وارانسی ڈویژن کے بی جے پی کے نائب صدر رام چندر مشرا نے منگل کو یو این آئی کو بتایا کہ 13 نومبر کی صبح ساڑھے دس بجے گورنر آنندی بین پٹیل یہاں پہنچیں گی اور پنڈت رام نریش ترپاٹھی آدیٹوریم میں گود لینے والے سبھی افراد کے ساتھ اسکولوں کے نظام اور میعار پر تبادلہ خیال کرنے کے ساتھ سبھی کو گود لینے کے عزم کا تصدیق نامہ فراہم کرکے ان کی حوصلہ افزائی کریں گی۔

انہوں نے بتایا کہ اسکولوں کو گود لینے سے پہلے ضلع میں پانچ ایسے اساتذہ کا انتخاب کیا گیا ہے جنہوں نے اپنے تنخواہ سے اسکولوں میں وسائل کا انتظام کیا اور تعلیمی بہتری کا انتظام پرائیویٹ اسکولوں کی طرز پر کیا۔ان اساتذہ کو گورنر اعزاز سے نوازیں گی۔

قابل ذکر ہے کہ سلطان پور میں دو سال قبل وزیر اعظم نریندر مودی کی اپیل پر بی جے پی کے لیڈر رام چندر مشر نے اپنے پارلیمانی حلقے میں کڑوار بلا ک کے تحت آنے والے دلئی گاؤں کے پرائمری اسکول کو گود لے کر وہاں پر وسائل کے انتظام کے ساتھ تعلیم کا میعار انگریزی اسکولوں جیسا کردیا تھا۔اب بی جے پی لیڈر کے خاندان کے بچے اسی اسکول میں پڑھتے ہیں۔اس کے بعد سے ضلع میں پرائمری اسکولوں کو گود لینے کی مہم چل پڑی ہے۔