بی بی ایم پی انتخابات کے لئے ریاستی الیکشن کمیشن کی تیاری ، ووٹر لسٹوں پر نظر ثانی کیلئے وارڈوں کی بنیاد پر افسروں کا تقرر
بنگلورو، 23؍جولائی(ایس او نیوز) برہت بنگلور و مہا نگر پالیکے (بی بی ایم پی) انتخابات کروانے کے لئے ریاستی الیکشن کمیشن کی طرف سے بڑے پیمانے پر تیاری شروع کر دی گئی ہے۔ ووٹر لسٹوں کی تیاری، نظرثانی اور ناموں کے اندراج اور تصحیح کے لئے الیکشن کمیشن کی طرف سے افسروں کے تقرر کا اعلان کیا گیا ہے۔ اس سلسلہ میں ایک گیزیٹ نوٹی فکیشن جمعہ کے روز جاری کیا گیا۔ریاستی الیکشن کمیشن کے انڈر سکریٹری کی طرف سے جاری خصوصی گیزیٹ میں واضح طور پر بتایا گیا ہے کہ کارپوریشن انتخابات کے لئے ہی ووٹر لسٹوں پر نظر ثانی کرنے کے مقصد سے یہ نوٹی فکیشن جاری کیا جا رہا ہے۔ اس کے لئے بنگلورو اربن ضلع اور بی بی ایم پی کے اسپیشل کمشنر اور جوائنٹ کمشنر ساؤتھ، جوائنٹ کمشنر مہادیو پورا کومختلف وارڈوں کے لئے ریجنل الیکشن آفیسر بنایا گیا ہے۔ ان کے علاوہ بی بی ایم پی کے جائنٹ کمشنرو ں کو اسمبلی حلقوں کی بنیاد پر آنے والے وارڈوں کے لئے انچارج مقرر کیا گیا ہے۔ ان افسروں کے ماتحت جو بھی وارڈ آئیں گے ان میں ووٹر لسٹوں کی تیاری ان کے ذمہ ہو گی۔