مینگلور میں یتیموں کے اسکول کو امداد دینے نکلی خاتون اچانک لاپتہ
مینگلور 4 مارچ (ایس او نیوز) اُلال میں یتیموں کے لئے قائم اسکول کو امدادی رقم دینے کے لئے گھر سے نکلی خاتون اچانک لاپتہ ہوگئی ہے جس کو لے کر گھر والوں سمیت علاقہ کےعوام میں بھی سخت تشویش پائی جارہی ہے۔
ذرائع سے ملی اطلاع کےمطابق واردات 2 مارچ کو اُلال پولس تھانہ حدود کے کلّاپو میں پیش آئی ہے اور لاپتہ ہونے والی خاتون کی شناخت حیناز ابراہیم (25) کی حیثیت سے کی گئی ہے جو سومیشور کے اومبٹکیرے کی رہائشی ہے۔ بتایا گیا ہے کہ وہ اپنے شوہر کے ساتھ گلف میں رہتی تھی، دو تین ہفتہ قبل ہی گاوں لوٹی تھی۔ بتایا گیا ہے کہ 2 مارچ کو وہ قریب بارہ بجے کلّاپو کے اندرونی علاقہ میں واقع ایک یتیموں کے اسکول کو امدادی رقم دینے اپنے گاوں اومبٹکیرے سے بس پر سوار ہوئی تھی اور کلّاپو میں اُتری تھی، وہاں سے اس نے آٹو رکشہ لیا تھا اور اسکول کے لئے روانہ ہوئی ، مگر اسکول پہنچنے سے پہلے ہی لاپتہ ہوگئی۔
حیناز کو ایک سال کا بچہ ہے اور وہ حاملہ بھی ہے۔ اس کی گمشدگی کو لے کر گھروالے بے حد پریشان ہیں۔ بتایا گیا ہے کہ حیناز اسکول کو دینے سات ہزار روپیہ سمیت سونے کے زیورات پہن کر نکلی تھی۔
اُلال پولس تھانہ میں گمشدگی کی رپورٹ درج کی گئی ہے اور پولس جانچ کررہی ہے۔