بھٹکل سمیت ضلع اُترکنڑا میں کورونا ویکسین کا اسٹاک ختم؛ آنے پر پہلے اُن لوگوں کو ٹیکہ دیا جائے گا جنہوں نے پہلا ڈوس لیا ہو؛ ڈپٹی کمشنر کا بیان
بھٹکل 9 مئی (ایس او نیوز) بھٹکل سمیت ضلع اُترکنڑا میں کورونا ویکسین کا اسٹاک ختم ہوچکا ہے جب اسٹاک آئے گا تو اولین ترجیح اُن لوگوں کو دی جائے گی جنہوں نے پہلا ڈوس لیا ہو۔ یہ بات ضلع کے ڈپٹی کمشنر ملئے موگھیلن نے بتائی۔ سنیچر کو بھٹکل دورہ کرنے کے بعد وہ اخبارنویسوں کے سوالوں کا جواب دے رہے تھے۔ انہوں نے بتایا کہ جن لوگوں نے ویکیسن کو پہلا ڈوس لیا ہے، ضلع میں اسٹاک پہنچتے ہی اُن کو دوسرا ڈوس دیاجائے گا، اُس کے بعد ہی دیگر لوگوں کو کورونا کا ٹیکہ دینے کا انتظام ہوگا۔
ایک اور سوال کا جواب دیتے ہوئے انہوں نے بتایا کہ میڈیا والے بھی کورونا وارئیرس ہیں، اور کورونا کے خلاف لڑنے میں انتظامیہ کا ساتھ دیتے رہے ہیں، اس لئے میڈیا والوں کو بھی اولین فرصت میں ایک ساتھ ٹیکہ لگوانے کا انتظام کیا جائے گا۔ ملئے مگھیلن نے بتایا کہ ابھی کورونا کی ٹیکہ کاری کے لئے عمر کی کوئی قید نہیں ہے۔ جن کی عمر 18 سال یا اس سے زائد ہوگی وہ تمام لوگ ویکیسن لے سکیں گے۔