بنگلورو کی اسکولوں میں وقت سے پہلے ہی داخلوں کی کارروائی شروع
بنگلورو،20/جنوری(ایس او نیوز) جاریہ تعلیمی سال کے اختتام کو ابھی تین ماہ کا وقت باقی ہے اور شہر میں واقع کچھ خانگی تعلیمی اداروں نے ابھی سے تعلیمی سال2020-21 کے لئے طلباء کے نئے داخلوں کی کارروائی شروع کردی ہے۔محکمہ برائے تعلیمات عامہ کے ایک واضح حکم نامے کے باوجود کہ تعلیمی اداروں میں نئے داخلوں کی کارروائی ہر سال اپریل کے پہلے ہفتہ ہی میں انجام دی جا سکتی ہے، کئی اسکولوں کی انتظامیہ نے طلباء کے والدین کے نام گشتی مراسلے جاری کر دئے ہیں اور بعض نے تو اپنی اسکولوں کے احاطہ میں باقاعدہ طور پر داخلہ سے متعلق جانکاری فراہم کرنے کے لئے کاؤنٹر قائم کر دئے ہیں۔اس وقت اسکولوں نے اپنے یہاں تعلیم حاصل کر رہے بچوں کے بہن بھائیوں کے لئے داخلوں کی کارروائی شروع کی ہے، نئے داخلے کے خواہشمند ایک بچہ کے والد نے بتایا کہ ”پچھلے ہفتہ ہماری بچی کی اسکول کی طرف سے یہ تحریر جب ہمیں حاصل ہوئی تو ہم حیران رہ گئے تھے۔ان کی اسکول کرسمس کی تعطیل کے بعد ابھی ابھی شروع ہوئی ہے اور انہوں نے اگلے تعلیمی سال کے لئے داخلوں کی کارروائی شروع کردی ہے۔مذکورہ تحریر میں ہم سے یہ کہا گیا ہے کہ اگر ہمارا کوئی دوسرا بچہ ہو تو ہم ابھی سے اس کے داخلہ کے لئے جگہ محفوظ کرالیں“۔راجا راجیشوری نگر میں واقع ایک مشہور اسکول نے اپنے طلباء کے والدین کے نام مراسلہ روانہ کیا ہے کہ وہ اپنے دوسرے بچوں کے لئے پری نرسری جماعتوں میں داخلوں کو ابھی سے محفوظ کرالیں۔بنشنکری کے دوسرے اسٹیج میں واقع ایک اور اسکول نے بھی اپنے طلباء کے بھائی بہنوں کے لئے نشستیں محفوظ کر نے کی کارروائی کا آغاز کر دیا ہے۔جنوبی بنگلور میں واقع ایک اسکول سے جب رابطہ کیا گیا تو انہوں نے بتایا کہ ”ہماری اسکول ابھی نئی نئی کھلی ہے اور یہ ہمارا تعلیم کا دوسرا سال ہے، اسی لئے ہمیں پری پرائمری میں داخلوں کی کارروائی کو جلدی شروع کرنا پڑا ہے، اگر ہم نے ایسا نہیں کیا تو ہمارے پاس ضروری تعداد میں طلباء نہیں رہیں گے۔ہم لوگ صرف ایک تھوڑی سی رقم لے کر نشستوں کو محفوظ کر دے رہے ہیں، داخلوں کی کارروائی تو بعد میں ہی ہوگی اور اصل داخلہ کے موقع پر ہی مکمل فیس وصول کی جائے گی“۔