دبئی،18؍مارچ (ایس او نیوز؍ایجنسی)متحدہ عرب امارات نے کرونا وائرس سے بچاؤ کیلئے چار ہفتوں تک مساجد سمیت تمام عبادت گاہوں میں نمازوں کی ادائیگی پر پابندی عائد کردی ہے۔یو اے ای کی سرکاری خبررساں ایجنسی وام کے مطابق حکومت نے یہ فیصلہ ملک میں کرونا وائرس کو پھیلنے سے روکنے کیلئے کوششوں کے ضمن میں کیا ہے۔ یو اے ای کی وزارت صحت نے اب تک ملک میں کرونا وائرس کے 98 کیسوں کی تصدیق کی ہے۔
اماراتی حکام نے مہلک وائرس کرونا کو پھیلنے سے روکنے کیلئے حالیہ دنوں میں متعدد اقدامات کیے ہیں۔یو اے ای نے دو روز پہلے غیرملکیوں کو ویزوں کا اجرا بند کردیا تھا اور لبنان، ترکی، عراق اور شام کیلئے پروازوں کی آمد ورفت معطل کردی تھی۔امارت ابوظہبی نے سیاحوں کی پسندیدہ سیرگاہ لوفرے میوزیم اور تھیم پارک کو کرونا وائرس کو پھیلنے سے روکنے کیلئے بند کردیا ہے۔ابو ظہبی میں سینما گھروں کو پہلے ہی بند کردیاگیا تھا۔یو اے ای میں شامل دبئی نے اس ماہ کے آخر تک تمام ہوٹل، بار، پب اور لاؤنج کو بند کردیا ہے۔دبئی نے گذشتہ ہفتے تمام تھیم پارک،تفریح گاہیں،نائٹ کلب، اور سینماگھر بند کردئے تھے اور شادی کی تقریبات اور کنسرٹس پر مارچ کے آخرتک پابندی لگا دی تھی۔
امارات نے تمام جِم خانے، کھیلوں کے مراکز اور سپرنگ کیمپ بھی بند کردیے ہیں اور مقامی اور مقیم افراد کو ہدایت کی ہے کہ وہ کسی ایک جگہ پر پچاس سے زیادہ تعداد میں اکٹھے نہ ہوں۔