کولار30/اپریل (ایس او نیوز/پی وی) شہر کے ڈوڈا پیٹ میں لاک ڈاون کے چلتے مسجد میں نماز ادا کرنے کے الزام میں تحصیلدار کے ذریعے  گیارہ لوگوں کو تحویل میں لینے کی  واردات جمعرات کو پیش آئی ہے۔  ذرائع سے ملی اطلاع کے مطابق  تحصیلدار شوبھیتا نے خود مسجد پہنچ کر  یہ کاروائی انجام دی ہے۔اور تمام گیارہ لوگوں کو پولس کے حوالے کیا ہے۔

بتایا گیا ہے کہ بعض لوگوں نے تحصیلدار کو اطلاع   دی تھی کہ  مسجد میں لوگ باجماعت نماز ادا کررہے ہیں، تحصیلدار نے فوراً پولس کی مدد لی اور متعلقہ مسجد میں پہنچ گئی اس تعلق سے تمام گیارہ لوگوں پر لاک ڈاون قانون کی خلاف ورزی کرنے کا الزام عائد کیا گیا ہے۔

تحصیلدار شوبھیتا نے اخبار نویسوں کو بتایا کہ  لاک ڈاون کے چلتے ایک جگہ پر جمع ہوکر عبادات کرنے یا کوئی بھی مذہبی جلوس یا جلسے پر مکمل پابندی عائد ہے۔اسی طرح مذہبی جگہوں پر کچھ شرائط کے ساتھ تین سے چار لوگوں کو عبادت کرنے کی اجازت ہے، مگر یہاں ایک ساتھ  گیارہ لوگ  جمع ہوکر عبادت کررہے تھے، اس لئے تمام گیارہ لوگوں کے خلاف  کولار شہری پولس تھانہ میں  معاملہ درج کرایا گیا ہے اور انہیں پولس کی تحویل میں دیا گیا ہے۔