بنگلورو،24؍اکتوبر(ایس او نیوز) ریاست میں ڈائری فارم اور گؤشالہ قائم کرنے کیلئے منظوری لینی ضروری ہے۔ آلودگی کنٹرول بورڈ نے یہ بات کہی ہے۔

اس پر تبصرہ کرتے ہوئے ریاستی وزیر برائے وقف، حج اور مویشی پالن پر بھو چوہان نے کہا کہ اس پر عمل کرنے سے ریاست کے کسانوں کیلئے مشکلات پیدا ہوں گی۔ انہوں نے کہا کہ کسان اور مویشی اس ملک کی ریڑھ کی ہڈی ہیں۔ ملک کی جی ڈی پی میں کسانوں کی حصہ داری اہم ہے۔ مویشی کے پالنے کیلئے اگر کسانوں کو آلودگی کنٹرول بورڈ کی جانب سے اجازت لینی پڑی تو ان کیلئے یہ مختلف مسائل پیدا کرسکتی ہے۔

ریاست کے کسانوں کو آلودگی کنٹرول بورڈکی اس نئی پالیسی سے مستثنیٰ قرار دینے کا انہوں نے مشورہ دیا ہے۔ بورڈ نے یہ بھی کہا ہے کہ گؤشالہ اور ڈائری فارم شہروں اور دیہاتوں سے 200میٹر دور فاصلہ پر قائم کرنا چاہئے اور اس کی تفصیل بورڈ کے علم میں لانا محکمہ مویشی پالن کی ذمہ داری ہے۔

انہوں نے بتایا کہ بورڈ کے اس فیصلہ کو واپس لینے انہوں نے وزیر اعلیٰ سے درخواست کی ہے۔ وزیر نے بتایا کہ کسی بھی صورت میں کسانوں کو مشکل نہیں ہونی چاہئے۔ اس کی ہم ہر گز اجازت نہیں دیں گے۔ انہوں نے بتایا کہ ان کے محکمہ نے کسانوں کی فلاح وبہبودی کیلئے کئی فلاحی اسکیموں کو متعارف کیا ہے۔ اس سے فائدہ اٹھانے کسان آگے نہیں آتے۔ بورڈ نے یہ فیصلہ کس بنیاد پر کیا مجھے معلوم نہیں۔ اس معاملہ پر فوری وزیر جنگلات اور قانون کے ساتھ تبادلہ خیال کرکے مناسب کارروائی کرنے وزیر اعلیٰ سے انہوں نے درخواست کی ہے۔