کرناٹک کے عوام کو بجلی کا زبردست جھٹکا ، نرخوں میں یکم اپریل سے بھاری اضافہ کا اعلان
بنگلورو، 5؍اپریل (ایس او نیوز) مہنگائی کی مار سے پریشان عام آدمی پٹرول اور ڈیزل کی قیمت میں روزانہ اضافہ اور ہوٹل میں کھانوں کی قیمت میں دس فیصد اور اس سے زیادہ کے اضافہ کے درمیان ریاستی حکومت نے بھی موقع پا کر ایک اور وار کر ہی دیا ہے۔ یہ ہے بجلی کے نرخوں میں بے تحاشہ اضافہ کا وار ۔ یکم اپریل 2022 سے ریاستی حکومت نے بجلی کے نرخوں میں اضافہ کا اعلان کیا ہے۔
کرناٹکا الیکٹری سٹی ریگولیٹری کمیشن (کے ای آر سی ) کی طرف سے نرخوں میں اضافہ کا اعلان کیا گیا ہے۔ یہ طے کیا گیا ہے کہ فی یونٹ بجلی کی قیمت میں 5 پیسے سے لے کر 35 پیسے کا اضافہ کیا جائے گا۔ بجلی کے نرخوں میں اضافہ کردیا ہے۔ اتناہی نہیں بلکہ بجلی کے نرخوں میں فکسڈ رقم کو 10 روپئے سے بڑھا کر 30 روپئے کردیا گیا ہے۔
کے ای آڑ سی کے چیرمین منجوناتھ نے بتایا کہ بجلی کمپنیوں ہیسکام ، بیسکام ، میسکام اور چیسکا م کی طرف سے ریاستی حکومت سے درخواست کی گئی تھی کہ فی یونٹ بجلی کی قیمت میں 1.39 روپئے کا اضافہ کیا جائے لیکن ریاستی حکومت نے اس کو نہیں مانا اور صرف 35 پیسے فی یونٹ کے اضافہ کی منظوری دی ہے۔
مسٹر منجوناتھ نے کہا ہے کہ بجلی کمپنیوں کو بجلی کی ترسیل میں گزشتہ چار سال سے خسارے کا سامنا کرنا پڑ رہا ہے ۔ انہوں نے کہا کہ بجلی کمپنیوں نے دعویٰ کیا ہے کہ گزشتہ دو سال سے کورونا وائرس کے سبب نرخوں میں اضافہ کی تجویز کو منظوری نہیں دی گئی جس کی وجہ سے خسارے میں اور زیادہ اضافہ ہوگیا ۔ فی یونٹ بجلی کی بنیادی شرح میں 5 پیسے کے اضافہ کے ساتھ فی ایچ پی ؍ کلو واٹ بجلی پر 10 روپئے تا 30 روپئے کا فکسڈ چارج میں اضافہ کیا گیا ہے۔ اس حساب سے فی یونٹ بجلی پر اضافہ 35 پیسے کا ہوگا۔