کرناٹکا ہائی کورٹ میں جسٹس کےعہدے کے لئے بھٹکل کے ایڈوکیٹ ناگیندر نائک کی سفارش؛ انجمن سے فارغ ہیں ناگیندر نائک
بھٹکل 4/اکتوبر (ایس او نیوز) سپریم کورٹ کی کالجیم کمیٹی نے مرکزی حکومت کو کرناٹکا ہائی کورٹ میں ججس کی تقرری کے لئے جن نو وُکلاء کے ناموں کی سفارش کی ہے، اُن میں بھٹکل سے تعلق رکھنے والے ایڈوکیٹ ناگیندر نائک کا نام بھی شامل ہے۔
بنگلور ہائی کورٹ میں گذشتہ 26 سالوں سے پریکٹس کرنے والے معروف وکیل ناگیندر نائک اگر ہائی کورٹ کے جج کے عہدہ پر فائز ہوتے ہیں، جس کا کہ پورا امکان ہے، تو وہ ہائی کورٹ میں جسٹس کے معزز اور اعلیٰ عہدہ پر فائز ہونے والے بھٹکل کے پہلے شخص ہوں گے۔
ذرائع سے ملی اطلاع کے مطابق سپریم کورٹ کی کالجیم کمیٹی نے جملہ 9 لوگوں کے ناموں کی فہرست مرکزی حکومت کو روانہ کی ہے اور انہیں کرناٹک ہائی کورٹ کے جسٹس کے عہدے پر فائز کرنے کی سفارش کی ہے جس میں ایڈوکیٹ ناگیندرا نائک کا نام بھی شامل ہے۔ بتایا جاتا ہے کہ سپریم کورٹ کی کالجیم کمیٹی کی جانب سے سفارش کرنے کے بعد مرکزی حکومت زیادہ تر اُن کی سفارشات کو قبول کرتی ہے، اس بناء پر ان کا جج بننا تقریبا طئے مانا جارہاہے۔
خیال رہے کہ بھٹکل انجمن آرٹس سائنس اینڈکامرس کالج سے گریجویشن مکمل کرنے والےبھٹکل تعلقہ کے سرپن کٹہ کے رہنے والے ناگیندر رام چندرا نائک نے بنگلور کالج سے ایل ایل بی کیا تھا۔
سپریم کورٹ کی کالجیم کمیٹی کی جانب سے سیکولر ذہن رکھنے والے ایڈوکیٹ ناگیندر نائک کے نام کی سفارش کئے جانے پر نہ صرف بھٹکل بلکہ ضلع اُتر کنڑا کے عوام میں بھی خوشی کی لہر دوڑ گئی ہے۔
