میڈیا کے ذریعہ بدنام کرنے کی مہم کے خلاف پاپولر فرنٹ اپنائے گی قانونی کاروائی کا راستہ
نئی دہلی، 16/جنوری (ایس او نیوز/پر یس ریلیز) "بی جے پی حکومت میڈیا کے ایک طبقے کی مدد سے پاپولر فرنٹ آف انڈیا کے خلاف سراسرجھوٹی باتیں پھیلاکر سی اے اے- این آر سی - این پی آر کی مخالفت میں ملک گیر پیمانے پر ہو رہے مظاہروں سے عوام کی توجہ ہٹانے کی کوشش کر رہی ہے۔ تنظیم کو بدنام کرنے کی مہم کے اس نئے سلسلے کے ذریعہ، زرخرید میڈیا اس ناکام حکومت کے ایجنڈے کو فروغ دینے کا کام کر رہی ہے۔ رپبلک ٹی وی سمیت پرنٹ، الیکٹرانک اور ٹی وی میڈیا کا ایک طبقہ پاپولر فرنٹ پر بے بنیاد الزامات لگا رہا ہے۔ ان کے خلاف ہم قانونی چارہ جوئی کا راستہ اپنائیں گے، جیسا کہ ہم نے پہلے بھی کیا تھا۔“ ان خیالات کا اظہار پاپولر فرنٹ آف انڈیا کے جنرل سکریٹری ایم محمد علی جناح نے کیا۔
”رپبلک ٹی وی کی حالیہ توہین آمیز خبر وں کے سلسلے میں تنظیم پہلے ہی اس کو قانونی نوٹس بھیج چکی ہے۔ اس سے پہلے سال 2018 میں، پاپولر فرنٹ آف انڈیا کی شکایت پر نشریاتی اتھارٹی (این بی ایس اے) نے رپبلک ٹی وی کو انتباہ جاری کیا تھا۔ لیکن چینل نے اب یہ ثابت کر دیا ہے کہ وہ خود کو ٹھیک کرنے کے لئے تیار نہیں ہے۔“
سال 2012 میں، پاپولر فرنٹ نے ڈیکن کرونیکل، ہندوستان ٹائمس اور دَینک جاگرن سمیت کچھ پرنٹ میڈیا کے خلاف پریس کونسل آف انڈیا میں 10 شکاتیں درج کرائی تھیں، جس کے بعد انہیں درج ذیل ہدایات دیتے ہوئے انتباہ دیا گیا تھا: ”کوئی بھی خبر شائع کرتے وقت کسی تنظیم کا نام لینے اور اس پر دہشت گردانہ سرگرمیوں میں شامل ہونے کا الزام لگانے میں بہت زیادہ احتیاط برتنی چاہئے۔ ایسی کوئی بھی خبرشائع کرنے سے پہلے مکمل تفتیش لازمی ہے، لیکن اس معاملے میں ایسا نہیں کیا گیا۔ اخبار کو چاہئے کہ وہ آگے اس کا پورا خیال رکھے اور اس قسم کے سنگین الزمات لگانے سے پہلے پوری جانچ کر لے۔ ہم سمجھتے ہیں کہ یہ ہدایات فرقہ وارانہ ہم آہنگی بنائے رکھنے اور اس ملک کے سیکولر تانے بانے کو باقی رکھنے کے لئے ضروری ہے۔“
محمد علی جناح نے کہا: ”اس کے علاوہ، صحافت کے اصول و ضوابط بھی واضح طور پر ہمیں بتاتے ہیں کہ مفاد عامہ کے معاملات سے جڑی خبروں، خیالات، تبصروں اور معلومات کو منصفانہ، مناسب، غیرجانبدارانہ، سادہ اور شائستہ انداز میں پیش کرکے عوام کی خدمت کرنا ہی صحافت کا بنیادی مقصدہے۔۔۔ میڈیا کو نامناسب، بے بنیاد، بے تکے، گمراہ کن یا ردّوبدل کئے گئے مواد سے اجتناب کرنا چاہئے۔ اصل مدّے یا معاملے کے تمام پہلؤں کا احاطہ کرنا ضروری ہے۔ افواہوں اور قیاس آرائیوں کو حقائق کے طور پر پیش نہیں کیا جانا چاہئے۔ مفاد عامہ میں جب بھی کوئی خبر یا مضمون ملے، جس میں کسی شہری کے خلاف تہمت یا تبصرہ موجود ہو، تو ایڈیٹر کو چاہئے کہ وہ پوری احتیاط کے ساتھ اسے پرکھے اور دیگر باوثوق ذرائع سے اس کی تحقیق کرنے کے ساتھ ساتھ اس شخص یا تنظیم سے بھی رابطہ کرکے اس بارے میں اس کی رائے، تبصرہ یا ردّعمل بھی معلوم کرے اور حسب ضرورت اس میں تصحیح کرکے اسے بھی خبر کے ساتھ شائع کرے۔“
محمد علی جناح نے اس جانب اشارہ کیا کہ پاپولر فرنٹ آف انڈیا کے متعلق کچھ حالیہ خبروں کو شائع کرتے وقت، مذکورہ بالا اصول و ضوابط پر عمل نہیں کیا گیا ہے، بلکہ اس کے بجائے ان کی صریح خلاف ورزی کی گئی ہے۔ لہٰذا اب واحد راستہ یہی ہے کہ انہیں بے نقاب کیا جائے اور انصاف کے کٹگھرے میں انہیں کھڑا کیا جائے۔
