امریکہ کا ایران پر عائد ہتھیاروں کی پابندی میں توسیع پر اصرار بدستور قائم

Source: S.O. News Service | By S O News | Published on 6th August 2020, 9:09 PM | عالمی خبریں |

دبئی،06 /اگست (آئی این ایس انڈیا)امریکہ ابھی تک ایران پر عائد ہتھیاروں کی بین الاقوامی پابندی کی قرار داد میں توسیع کے موقف پر مصر ہے۔ یہ پابندی رواں سال اکتوبر میں اختتام پذیر ہو رہی ہے۔اس سلسلے میں امریکی وزیر خارجہ مائیک پومپیو نے زور دے کر کہا ہے کہ اُن کا ملک آئندہ ہفتے اقوام متحدہ کی سلامتی کونسل میں ایک قرار داد کا منصوبہ پیش کرے گا۔ اس قرار داد میں ایران پر عائد ہتھیاروں کی پابندی میں توسیع کا مطالبہ کیا گیا ہے۔

بدھ کی شام صحافیوں سے گفتگو کرتے ہوئے پومپیو کا کہنا تھا کہ صدر ڈونلڈ ٹرمپ کی انتظامیہ ایران پر ہتھیاروں کی پابندی میں توسیع کو یقینی بنانے کے لیے ''ایک طریقے'' پر کام کرے گی۔امریکی وزیر خارجہ نے زور دے کر کہا کہ روس اور چین کی مخالفت کے باوجود انہیں یقین ہے کہ اس سلسلے میں کی جانے والی کوشش کامیابی سے ہم کنار ہو گی۔امریکا کی جانب سے تیار کردہ قرار داد کے مسودے کو سلامتی کونسل کے 15 میں سے کم از کم 9 ارکان کی تائید کی ضرورت ہو گی۔ اس پر روس اور چین ویٹو کا حق استعمال کر سکتے ہیں۔ ماسکو اور بیجنگ واضح کر چکے ہیں کہ وہ ویٹو کا حق استعمال کریں گے۔پومپیو نے واضح کیا کہ ایران پر عائد ہتھیاروں کی پابندی کو ختم نہیں ہونے دیا جائے گا۔ انہوں نے خطے میں عدم استحکام پھیلانے کے حوالے سے تہران کے کردار کا حوالہ دیتے ہوئے کہا کہ ایران کی جانب سے بدستور حوثیوں کو اسلحہ فراہم کرنے کے سبب یمن کا تنازع جاری ہے۔امریکی وزیر خارجہ کے مطابق ایسے ممالک موجود ہیں جو ہتھیاروں کے حصول کے واسطے کوشاں ہیں،،، اس سے مشرق وسطی کا استحکام متزلزل ہو گا، اسرائیل کو خطرہ ہو گا، یورپ کو خطرہ ہو گا اور ساتھ ہی امریکیوں کی جانوں کو بھی سنگین خطرہ درپیش ہو گا۔ پومپیو نے کہا کہ ہم ایسا ہر گز نہیں ہونے دیں گے، ہم تمام تر سفارتی راستے استعمال کریں گے۔اس سے قبل ایران کے لیے امریکا کے خصوصی ایلچی برائن ہُک یہ باور کرا چکے ہیں کہ صدر ٹرمپ کا کہنا ہے کہ ایران کو کسی طور ایٹمی ہتھیار حاصل نہیں کرنے دیے جائیں گے۔یاد رہے کہ ایران پر 2007ء سے ہتھیاروں کی خرید و فروخت پر پابندی عائد ہے۔ یہ پابندی سلامتی کونسل کی قرار داد 2231 کے تحت عائد کی گئی۔ تاہم 2015 کے ایرانی جوہری معاہدے کے موجب یہ بات طے پائی گئی کہ 18 اکتوبر 2020ء کو ہتھیاروں سے متعلق یہ پابندی ختم ہو جائے گی۔امریکا کی کوشش ہے کہ ایران کو روایتی ہتھیاروں کی فروخت پر عائد پابندی سے متعلق اقوام متحدہ کی قرار داد میں غیر معینہ مدت کے لیے توسیع کر دی جائے۔ جوہری معاہدے سے علاحدگی کے باوجود امریکا یہ باور کراتا ہے کہ وہ ایران کی جانب سے جوہری پاسداریوں پر عمل نہ کرنے کی صورت میں تہران پر پابندیاں عائد کرنے کا حق رکھتا ہے۔اس موقف کے لیے امریکی وزارت خارجہ یہ حجت پیش کرتی ہے کہ اگرچہ امریکا اب جوہری معاہدے میں فریق نہیں رہا تاہم سلامتی کونسل کی قرار داد کے تحت درحقیقت وہ اب بھی شریک کی حیثیت رکھتا ہے۔

ایک نظر اس پر بھی

ماسکو کنسرٹ ہال حملے میں 143ہلاکتیں

روس کے دارالحکومت ماسکو میں ایک کنسرٹ ہال پر جمعہ کو ہونے والے حملے میں مرنے والوں کی تعداد بڑھ کر 143 ہوگئی ہے جبکہ 100 سے زائد افراد زخمی ہیں۔روس کی تحقیقاتی کمیٹی نے ہفتے کے روز یہ اطلاع دی۔ کمیٹی نے کہا کہ ایمرجنسی سروسز ماسکو اوبلاست میں کروکس سٹی ہال، دہشت گردانہ حملے کی جگہ ...

80 ہزار افراد نے مسجد اقصیٰ میں نماز جمعہ ادا کی

قابض اسرائیلی فوجوں  کی سختی کے باوجود رواں  سال رمضان کے پہلے جمعہ کو ۸۰؍ ہزار مسلمانوں   نے بیت المقدس میں  پہنچ کر نماز جمعہ ادا کی۔ قدس نیوز نیٹورک نے جو ویڈیوشیئرکئے ہیں  میں  دیکھا جاسکتاہے کہ جوق در جوق مغربی کنارہ، راملہ اور دیگر علاقوں  سے فلسطینی شہری پیدل اور بسوں ...

شہریت ترمیمی قانون پر امریکہ نے بھی اپنی تشویش ظاہر کردی

امریکہ اور نے ہندوستان کے متنازعہ شہریت ترمیمی قانون پر عدم تحفظات کا اظہار کردیا۔ امریکی محکمہ خارجہ کے ترجمان نے بیان میں کہا کہ ہندوستان میں شہریت کے متنازعہ ترمیمی قانون کے نفاذ پر تشویش ہے۔ ایکٹ کے نافذ ہونے کے بعد صورتحال کا بغور جائزہ لے رہے ہیں۔

غزہ پر اسرائیلی حملوں کے سبب جان گنوانے والے فلسطینیوں کی تعداد 31272 ہوئی

غزہ پٹی پر جاری اسرائیلی حملوں سے فلسطینیوں کی ہلاکتوں کی تعداد 31272 ہو گئی ہے۔ غزہ میں قائم وزارت صحت نے بدھ کو یہ اطلاع دی۔ وزارت نے ایک بیان میں کہا کہ اسرائیلی فورسز نے گزشتہ 24 گھنٹوں کے دوران 88 فلسطینیوں کو قتل اور 135 دیگر کو زخمی کیا، جس سے گزشتہ اکتوبر میں اسرائیل اور حماس ...

غزہ میں امداد کیلئے قطار میں منتظر افراد کو پھر نشانہ بنایا گیا، 11 شہید

  انسانیت کی تمام حدوں  کو پار کرتے ہوئے اسرائیلی فوجوں  نے بدھ کو پھر بھکمری کے شکار ان پریشان حال لوگوں  کو نشانہ بنایا جو اپنے بچوں  کی پیٹ کی آگ بجھانے کیلئے امداد حاصل کرنے کے مقصد سے قطار میں  لگے ہوئے تھے۔ بدھ کے اس حملے میں  ۱۱؍ افراد کی شہادت کی تصدیق ہوئی ہے جس کے بعد ...

انڈونیشیا میں سیلاب اور چٹان کھسکنے سے تباہی، 19 افراد ہلاک ،متعدد زخمی

انڈونیشیا کے جزیرے سماترا میں مسلسل بارش نے سیلاب اور چٹان کھسکنے سے بڑے پیمانے پرتباہی ہوئی ہے۔ اس دوران 5سے زائد گھر دب گئے۔ مکانات کے ملبے سے12 لاشیں نکالی گئیں اور 7افراد کو شدید زخمی حالت میں اسپتال پہنچایا گیا۔ ملبے سے دیگر 6 افراد کو بحفاظت نکالا گیا جبکہ5 افراد اب تک ...