بنگلورو، 6؍ اپریل (ایس او نیوز) ریاست کے تمام 4 ؍ سرکاری ٹرانسپورٹ کارپوریشن کے ملازمین نے 7؍ اپریل سے ہڑتال شروع کرنے کا اعلان کیا ہے۔ اس ضمن میں ریاستی وزیر برائے ٹرانسپورٹ لکشمن ساود ی نے  یہاں ایک اخباری کانفرنس میں کہا کہ ٹرانسپورٹ ملازمین نے حکومت کے سامنے  جو 9 مطالبات رکھے  تھے۔ ان میں سے 8 مطالبات پورے کئے گئے ہیں ۔ 

ودھان سودھا میں منعقدہ ایک اخباری کانفرنس سے خطاب کرتے ہوئے وزیر موصوف نے کہا کہ ٹرانسپورٹ ملازمین نے 9مطالبات پیش کئے  تھے۔ان میں سے 8 مطا لبے  پورے کئے جا چکے ہیں۔ اس وقت ضابطہ اخلاق نافذ ہے، اس لئے 6 ویں پے کمیشن کے مطابق ملازمین کی تنخواہ میں اضافہ ممکن نہ ہوسکا  ، اس لئے ٹرانسپورٹ ملازمین کی تنخواہ میں اضافہ کرنے کی منظوری طلب کرتے ہوئے حکومت نے الیکشن کمیشن کو خط لکھا ہے کہ ہم ملازمین کی تنخواہ میں اضافہ کرنے کے لئے تیار ہیں لیکن انتخابی ضابطہ اخلاق کی وجہ سے اضافہ کرنے سے قاصر ہیں۔ ہر سال ہم نے 2 فیصد کا اضافہ کیا ہے۔

 انہوں نے کہا کہ عام طور پر ملازمین کا پروبیشنری پیریڈ دو سال ہوتا ہے، اس کو کم کر کے ایک سال کر دیا گیا ہے۔ کورونا سے پہلے بسوں میں مسافروں کی آمدورفت ایک کروڑ ہوا کرتی تھی۔ اب یہ تعداد صرف 65 لاکھ ہے۔ اس لئے اب محکمہ کو جو آمدنی ہورہی تھی اور ایندھن کی قیمتوں میں اضافے کی وجہ سے تنخواہ  کے لئے سالانہ1962  کروڑ روپے کی قلت ہے۔ اس کے باوجود وزیراعلیٰ  نے اتنی رقم حکومت کی طرف سے دی ہے۔ کورونا  اور لاک ڈاؤن کی وجہ سے کسی بھی ملازم کی تنخواہ میں کٹوتی نہیں کی ہے۔