کیرالہ سے آنے والے مسافروں کی جانچ کے لئے 4 مقامات پر لگے چیک پوسٹ
بنٹوال ،2؍ اگست (ایس او نیوز) کووڈ کی تیسری لہر پر قابو پانے کے لئے جنوبی کینرا ضلع انتظامیہ نے کیرالہ سے آنے والے افراد کی جانچ کا سلسلہ شروع کردیا ہے جس کے لئے بنٹوال پولیس کی طرف سے کیرالہ سرحد کے چار مقامات پر چیک پوسٹ لگائے گئے ہیں ۔
یاد رہے کہ ریاستی حکومت نے 31 جولائی کو جاری کی گئی ہدایت میں کیرالہ اور مہاراشٹرا سے کرناٹکا میں داخل ہونے والوں کے لئے آر ٹی پی سی آر نگیٹیو رپورٹ کو لازمی قرار دیا تھا ۔ جنوبی کینرا انتظامیہ نے اس پر آج 2 اگست سے عمل در آمد شروع کیا ہے ۔
ڈپٹی پولیس کمشنر کی ہدایات کے مطابق ساراڈکا چیک پوسٹ پر بیریکیڈس لگائے گئے ہیں ۔ اسی طرح کیرالہ سرحد سے متصل سالیتور، کنیانا اور بیریپڈاو میں بھی پولیس نے بیریکیڈس لگائے ہیں جس کی نگرانی وٹّل کے انسپکٹر ناگراج ایچ وی کی قیادت پولیس اور ہوم گارڈس کا عملہ کررہا ہے۔ ان مقامات سے انہی افراد کو کرناٹکا میں داخل ہونے کی اجازت دی جارہی ہے جن کے پاس آر ٹی پی سی آر نگیٹیو رپورٹ موجود ہو اور وہ 72 گھنٹوں سے زیادہ پرانی نہ ہو ۔