بنٹوال میں منشیات فروشی کے خلاف پولیس کے چھاپے : بڑی مقدار میں گانجہ ضبط۔ دو ملزمین گرفتار۔ تیسرا فرار
مینگلور 8؍ ستمبر (ایس او نیوز) ضلع دکشن کنڑا کے بنٹوال میں پولیس اور ڈی سی بی (ڈسٹرکٹ کرائم بیورو) نے دو الگ الگ چھاپہ ماری کے دوران بڑی مقدار میں گانجہ ضبط کرتے ہوئے دو ملزمین کو گرفتار کرلیا ہے جبکہ تیسر ا ملزم فرار ہونے میں کامیاب ہوگیا ہے۔
اطلاع کے مطابق پہلے معاملے میں بنٹوال پولیس اسٹیشن کے سب انسپکٹر نے موڈا نامی گاؤں میں اپنے عملے ساتھ اس کرایے کے مکان پر چھاپہ ماراجو محمد ایم نامی شخص کی ملکیت ے۔وہاں پر ان کو گانجے کی کلیاں، پتّے، سوکھی ہوئی ٹہنیاں اور گانجے کے پودوں کے نیم خشک ٹکڑے ملے جس کا مجموعی وزن 39.948کلو گرام تھا اور اس کی مالیت کا اندازہ 19,97,400 روپے لگایا گیا ہے۔پولیس نے وہاں پر مقیم محمد ثابت (۳۰سال) کو گرفتار کرلیا جبکہ محمد انصار نامی ملزم پولیس کوچکمہ دے کر موقع پر سے فرار ہونے میں کامیاب ہوگیا۔نارکوٹک ڈرگس اینڈ سائکوٹروپک سبسٹیانسس (NDPS)ایکٹ 1985کے تحت کیس درج کرلیا گیا ہے اور تحقیقات جاری ہے۔
اسی طرح کے دوسرے معاملے میں ڈسٹرکٹ کرائم بیورو کے افسران اور عملے نے ویراکمبا گاؤں میں ایک آٹورکشا کو روک کر تلاشی لی تو اس کے اندربیٹھے ہوئے محمد آستو عرف محمد علی (28سال) نامی شخص کے پاس سے 880گرام گانجہ برآمد ہوا۔ضبط کیے گئے گانجہ، موبائل فون، آٹو رکشا اور نقدی وغیرہ کی جملہ مالیت کا اندازہ 98,550روپے لگایا گیا ہے۔وٹلا پولیس اسٹیشن میں کیس درج کرتے ہوئےمحمد علی کو این ڈی پی ایس قانون کے تحت گرفتار کرلیا گیا ہے ۔
