منگلورو میں قحبہ خانے پر پولیس کا چھاپہ۔ 2ملزمین گرفتار
منگلورو 3اپریل (ایس او نیوز) شہر کی اکنامکس اینڈ نارکوٹکس کرائم پولیس نے نانتھور علاقے میں چھاپہ ماری کرتے ہوئے وہاں پر چلائے جارہے قحبہ خانے کا پردہ فاش کیا۔ موقع پر سے جسم فروشی کا کاروبار چلانے والے دو ملزمین کو گرفتار کرنے کے علاوہ اس دھندے کے لئے استعمال کی جانے والی تین خواتین کو بچالیا گیا ہے۔
پولیس کا کہنا ہے کہ ویب سائٹ کے ذریعے جسم فروشی کا دھندا چلائے جانے کی مصدقہ اطلاعات ملنے پر اس نے’اسٹار لیگیسی اپارٹمنٹ‘ پر چھاپہ مارنے کی کارروائی کی تھی۔گرفتار کیے گئے ملزمین کا نام آئیوان سائرل پنٹوعرف پون(۳۵سال) اور ستیش اچاریہ (۳۱سال) گرفتار کیا جبکہ اترپردیش اور اڑیسہ کی تین خاتون کو قحبہ خانے سے بچالیا گیا ہے۔
پولیس کے بیان کے مطابق ویب سائٹ پر لڑکیوں کی تصاویر پوسٹ کرتے ہوئے لوگوں کو طوائفوں کے خدما ت حاصل کرنے کے لئے دعوت دی جاتی تھی۔پولیس نے چھاپے کے دوران موبائل فونس اور 23,500روپے نقد ضبط کرلیے۔اکنامکس اینڈ نارکوٹکس کرائم پولیس کے انسپکٹر رام کرشنا کے کے اور دیگر پولیس عملے نے اس کارروائی میں حصہ لیا۔
