ہوناور:6؍جولائی  (ایس اؤ نیوز) تعلقہ کے ہلدی پور کے وکدبائیلو حدود میں واقع جیون گارمنٹس بنگلورو کے ایم ایس آدتیا برلا فیشن اور رٹیل لمیٹیڈ سے منظوری لئے بغیر ان کے برانڈ ڈریس کے نام پر ڈریسس تیار کرکے فروخت کئے جانے کے متعلق شکایت درج ہوئی تھی۔ پولس نے چھاپہ مارکر 50لاکھ روپئے مالیت کے ریڈی میڈ کپڑے ضبط کرلئے ہیں۔

آدتیا برلا فیشن  اینڈ رٹیل لمیٹیڈ کمپنی کے پسندیدہ ڈڑیس برانڈ الن سولی، لوئی فلپ، وین ہیوزن ، پیٹر انگلینڈ، پیپل جیسے جعلی ڈریس تیار کرکے گاہکوں کو کمپنی ڈریس بتاتے ہوئے  دھوکہ سے فروخت کرنے کا الزام لگایا گیا تھا۔ معاملے کی جانکاری ملنےکے بعد کمپنی کے مینجر راگھو آر نے ہوناور پولس تھانے میں شکایت درج کرتے ہوئے الزام لگایا تھا کہ اپنی کمپنی کے اشیاء کو لے کر عوام سے دھوکہ کرنے ، کمپنی کو نقصان پہنچانے ، برانڈ کی قیمت گھٹانے اور کمپنی حقوق کا غلط استعمال کرنے کی بات کہی تھی ۔ ہوناور کے پی ایس آئی سنتوش کائی کنی نے معاملے کو سنجیدگی سے لیتے ہوئے اپنی ٹیم کے ساتھ گارمنٹس پر چھاپہ مارکر 50لاکھ روپئے مالیت کے گارمنٹس ضبط کرلئے ہیں۔ معاملے کو لےکر گارمنٹس کے مالک جناردھن نائک ہلدی پور کے خلاف ہوناور پولس تھانے میں کیس درج کرلینےکے بعد جانچ جاری رکھے  ہوئے ہیں۔

تعلقہ میں اس طرح کے دھوکہ دہی کا معاملہ پہلی مرتبہ  منظر عام پر آنے سے عوام حیرت سے اپنے کپڑوں کو دیکھ رہے ہیں کہ ہم نے جو کپڑے زیب تن کئے ہوئے ہیں کیا وہ قیمتی ، برانڈڈ ہیں یا نقلی ہیں۔ ضلع میں گارمنٹس کاروبار ابھی ابتدائی مرحلے میں ہے ایسے میں جعلی کپڑے تیار کرنے کا معاملہ کاروبار کو بری طرح متاثر کرنےکی بات عوامی سطح پر کہی جارہی ہے اور عوام سے دھوکہ دہی ہونےپراعتماد کو ٹھیس لگنے کی بات گاہکوں نےکہی۔