لاک ڈاؤن کے نفاذ میں کوئی نرمی نہیں برتی جائے گی: بھاسکر راؤ
بنگلورو،16؍اپریل (ایس او نیوز) شہر بنگلورو میں کورونا وائرس کے پھیلاؤ کو روکنے کے لئے جاری لاک ڈاؤن کو مؤثر طور پر نافذ کرنے کے لئے بنگلورو پولیس نے 20؍اپریل تک امتناعی احکامات کو سختی سے نافذ کرنے کا فیصلہ کیا ہے۔ یہ بات شہر کے پولیس بھاسکر راؤ نے کہی۔
چہارشنبہ کو اپنے دفتر میں اخباری نمائندوں سے بات کرتے ہوئے بھاسکر راؤ نے کہا کہ کورونا وائرس کو قابو میں کرنے کے لئے مرکزی وزارت داخلہ کی طرف سے جو رہنما خطوط جاری کئے گئے ہیں، ان کے مطابق لاک ڈاؤن کو سخت کرنے کے لئے تمام ضروری قدم اٹھائے جائیں گے۔
انہوں نے کہا کہ 15؍فروری 2020 کے بعد سے ملک میں کورونا وائرس کے واقعات پھیلنا شروع ہوئے۔ اس کے بعد جتنے لوگ بھی بیرون ممالک جا کر آئے ہیں ان تمام کو لازمی طور پر اپنا کورونا وائرس ٹیسٹ کروانا ہوگا اور اگر ضرورت پڑی تو انہیں کوارنٹائن میں بھی رہنا پڑے گا۔ بصورت دیگر ان تمام پر تعذیرات ہند کی دفعہ 188 کے تحت قانون کارروائی کی جائے گی۔
انہوں نے نے کہا کہ لاک ڈاؤن کے دوران جن اداروں اور انجمنوں کو رعایت دی گئی ہے ان کو بھی وقتاً فوقتاً محکمہ صحت کی طرف سے جاری ہونے والے احکامات پر لازمی طور پر عمل کرناپڑے گا۔
پولیس کمشنر نے کہا کہ سماجی فاصلے کی پابندی طرز حیات کا نیا ضابطہ ہے، اس میں کسی طرح کی غفلت برداشت نہیں کی جائے گی۔
انہوں نے کہا کہ میڈیکل عملہ کو لانے لے جانے کے لئے پبلک ٹرانسپورٹ نظام کے استعمال کی اجازت دی جاچکی ہے اس میں کسی طرح کی رکاوٹ نہیں ہوگی۔
انہوں نے کہا کہ مرکزی وزارت داخلہ کی طرف سے جو رہنما خطوط جاری ہوئے ہیں ان کے کے مطابق تمام مرکزی اور ریاستی حکومت کے دفاتر بند رہیں گے۔ تجارتی مراکز اور دکانیں بھی بند رہیں گی۔ عبادت خانون کو کھولنے کی اجازت نہیں دی جائے گی۔ انہوں نے کہا کہ مرکزی حکومت کی طرف سے لاک ڈاؤن کے سلسلہ میں 20 ؍اپریل اور 3 ؍مئی تک جو بھی احکامات صادر کئے گئے ہیں ان تمام کا نفاذ کرنے میں کسی بھی طرف کی نرمی نہیں برتی جائے گی۔
