بنگلورو، 22؍جولائی (ایس او نیوز) پولیس نے 9 لڑکیوں کو ڈانس بار میں ملازمت کا جھانسہ دے کر دبئی اسمگل کرنے والے 37 سالہ شخص کو گرفتار کر لیا ۔

سی سی بی ڈپٹی کمشنر پولیس کلدیپ جین نے بتایا کہ بسواراج کلساڈ نے لاک ڈاؤن سے قبل ایک لاکھ روپئے ماہانہ آمدنی کا وعدہ کر کے دبئی بھیجا لیکن درحقیقت انہیں اسمگل کیا۔ شبہ ہے کہ تمام لڑکیوں کو جسم فروشی کے دھندے میں دھکیل دیا گیا حالانکہ کچھ اپنی مرضی سے وہاں گئیں۔ اتفا ق سے کرناٹک ، آندھرا پردیش اور تامل ناڈو ریاستوں سے تعلق رکھنے والی یہ لڑکیاں وندھے بھارت فلائٹ سے دبئی سے بحفاظت واپس ہوگئیں۔ دبئی میں پھنسی 20 تا 25 سال کی عمر کی ان لڑکیوں نے واپسی کیلئے لاک ڈاؤن کے دوران ہندوستانی سفارت خانہ سے رابطہ کیا۔

ڈپٹی کمشنر پولیس کلدیپ جین نے کہا کہ ہم نے کلساڈ کو تعزیرات ہند کی دفعات 420 اور 370 کے تحت دھوکہ دہی اور انسانی سمگلنگ، بردہ فروشی کے الزام میں گرفتار کر لیا ۔ ملزم نے چینائی اور دہلی کے پتوں سے مدراس کا سٹنگ ، انٹرنیشنل ایونٹس ، نامی کمپنی قائم کی تھی۔