کرناٹک میں کسانوں کے بچوں کی اسکالرشپ اسکیم کامیابی سے نافذ ہو:وزیراعظم کی خواہش
نئی دہلی، 11 نومبر (آئی این ایس انڈیا) کرناٹک کے وزیر اعلی بسواراج ایس بومئی نے جمعرات کو کہا کہ وزیر اعظم نریندر مودی نے ریاستی حکومت سے کہا ہے کہ وہ کسانوں کے بچوں کیلئے حال ہی میں شروع کی گئی اسٹیٹ ایجوکیشن اسکالرشپ اسکیم کو کامیابی کے ساتھ نافذ کرے،تاکہ اسے ملک کے باقی حصوں میں بھی نافذ کیا جائے۔ یہاں وزیر اعظم سے ملاقات کے بعدبومئی نے نامہ نگاروں کو بتایا کہ مودی نے سرکاری ٹینڈرز کی جانچ پڑتال کے لیے ایک پینل تشکیل دینے، بے گھر افراد کو پلاٹ دینے کے ساتھ ساتھ نئی تعلیمی پالیسی کو لاگو کرنے کے لیے ریاستی حکومت کے اقدامات پر بھی تبادلہ خیال کیا۔ کرناٹک کے وزیر اعلیٰ قومی راجدھانی کے دو روزہ دورے پر ہیں۔ وزیر اعظم مودی کے ساتھ ملاقات مثبت رہی۔ وزیراعلی کا عہدہ سنبھالنے کے بعد بہت سے مسائل پر تفصیلی تبادلہ خیال کیا، خاص طور پر پچھلے 100 دنوں میں انتظامی اقدامات سے متعلق تعلیمی وظائف کی فراہمی کی اسکیم کو سراہا۔ انہوں نے کہاکہ انہوں نے (مودی) ریاست سے کہا کہ وہ اس پروگرام کو کامیاب بنائے کیونکہ اس سے اسے دوسری ریاستوں میں لاگو کرنے میں مدد ملے گی۔ ان کے مطابق ریاست میں نئی تعلیمی پالیسی کے نفاذ پر تفصیل سے بات کرتے ہوئے مودی نے کہا کہ نئی پالیسی کے بارے میں اساتذہ اور طلبہ میں بیداری پیدا کرنے کی ضرورت ہے۔