نئی دہلی،13؍مئی (ایس او نیوز؍ایجنسی) ملک میں کورونا وائرس کے بڑھتے ہوئے قہر اور لاک ڈاؤن کی توسیع یا ختم ہونے کے تذبذب کے دوران وزیر اعظم نریندر مودی نے فی الفور کو ئی حتمی اعلان نہیں کیا، البتہ اس وبا کی ملک میں صورتحال کا تذکرہ کرتے ہوئے کہا کہ یہ وبا ایک لمبے عرصہ تک ہماری زندگی کے ساتھ رہے گی- اور ہمیں اس سے لڑنا ہے- انہوں نے کہا کہ چوتھے لاک ڈاؤن سے متعلق تفصیلات 18/مئی سے پہلے دی جائیں گی- اورلاک ڈاؤن کا چوتھا مرحلہ نئے رنگ روپ والا ہوگا-
وزیر اعظم نریندر مودی نے منگل کو ملک میں کووِڈ-19 کی صورتحال پر اظہار خیال کرتے ہوئے کہا کہ ہم کورونا وائرس سے جنگ کی حالت میں ہیں اور ہمارا یہ عزم ہے کہ ہم اسے شکست دیں گے- انہوں نے کہا کہ ا س سے بچنے کے احتیاطی تدابیر کے ساتھ سماجی فاصلے کو برقرار رکھنے کے اصول پر عمل کرتے ہوئے ہم کورونا سے لڑیں گے بھی اور آگے بھی بڑھیں گے-وزیر اعظم نے کسانوں اور مزدوروں کو 20/ لاکھ کروڑ روپیوں کا خصوصی معاشی پیکیج کا اعلان کرتے ہوئے کہا کہ یہ ہندوستان کی جی ڈی پی کا تقریباً10/فیصد ہے-
قوم سے خطاب کرتے ہوئے مودی نے کہا کہ کورونا وائرس سے لڑتے ہوئے ہمیں تین مہینے ہوگئے ہیں - ہندوستان میں لوگوں نے اپنے عزیزوں کو کھویاہے، ان کے تئیں ہمدردی کا اظہار کرتا ہوں - ایسا بحران ہم نے نہ پہلے دیکھا نہ سنا تھا- یہ سانحہ تصور سے بالاتر ہے، لیکن ٹوٹنا، بکھرنا انسان کو قبول نہیں ہے- ہمیں اس جنگ میں محتاط رہ کر بچنا بھی ہے اور آگے بڑھنا بھی ہے-ملک میں کورونا وائرس کے پیش نظر نافذ لاک ڈاؤن کے درمیان وزیر اعظم مودی کا قوم کے نام یہ پانچواں خطاب ہے- اس سے پہلے آخری مرتبہ انہوں نے 14/اپریل کوقوم سے خطاب کیا تھا-وزیر اعظم نے کہا کہ گزشتہ صدی سے ہی سنتے آئے ہیں کہ21ویں صدی ہندوستان کی ہوگی- کورونا بحران کے دوران ہمیں صورتحال کو اچھے سے دیکھنے اور سمجھنے کا موقع ملا ہے- انہوں نے کہا کہ دنیا کی آج کی صورتحال ہمیں سکھاتی ہے کہ اس سے لڑنے کا ایک ہی راستہ ہے خود کفیل ہندوستان-وزیر اعظم مودی نے خصوصی معاشی پیکیج خود کفیل ہندوستان مہم کا اعلان کیا، جو ہندوستان کی جی ڈی پی کا دس فیصد کے آس پاس ہوگا-
وزیر اعظم نے کہا کہ اس سے ہندوستانی صنعتوں کو مضبوطی ملے گی-قابل ذکر ہے کہ گزشتہ روز وزیر اعظم نریندر مودی نے ملک کی سبھی ریاستوں اور مرکز کے زیر انتظام علاقوں کے وزرائے اعلیٰ کے ساتھ ویڈیو کا نفرنسنگ کرکے تبادلہ خیال کیا تھا اور ملک میں کورونا کی موجودہ صورتحال پر گفتگو کی تھی-وزیر اعظم نریندر مودی نے کورونا وائرس کو پھیلنے سے روکنے، لاک ڈاؤن سے مرحلہ وار طریقہ سے باہر نکلنے اور اقتصادی سرگرمیاں تیز کرنے کی تدابیر پر وزرائے اعلیٰ سے بات چیت کی تھی- گزشتہ روز تقریباً 6/گھنٹوں تک چلی اس میٹنگ میں وزیر اعظم مودی نے اقتصادی سرگرمیوں کو بڑھانے پر بھی زور دیا- و
زیر اعظم مودی نے کہا کہ ملک کی معیشت کو لے کر بھی مشورے دیں - مودی نے کہا ”میری آپ سب سے درخواست ہے کہ آپ15/ مئی تک اپنی حکمت عملی بتائیں کہ آپ اپنی ریاست میں لاک ڈاؤن سے کس طرح نمٹنا چاہتے ہیں - میں چاہتا ہوں کہ ریاستیں لاک ڈاؤن کے دوران اور اس سے آہستہ آہستہ باہر نکلنے کی منصوبہ بندی کا بلیو پرنٹ بنائیں“- انہوں نے کہا تھا کہ ہمیں آنے والے وقت میں مختلف چیلنجوں کے تمام پہلوؤں کے نقطہ نظر سے وسیع نقطہ نظر اپنانے ہوں گے- مانسون کی آمد کے ساتھ ہی کورونا وائرس سے مختلف کئی بیماریاں آ سکتی ہیں اور ہمیں ان کے لئے تیاری کرنی ہو گی اور اپنے طبی نظام کو مضبوط بنانا ہوگا-
’لوکل‘کے لئے’ووکل‘ بنیں:مودی نے کورونا وائرس)کووِڈ19- (وبا کے دوران ملک کو خود کفیل بنانے کے لیے عوام سے مقامی پیداوار خریدنے اور اس پر فخر کرنے کی اپیل کی ہے۔ مودی نے کہا کہ کورونا بحران کے دوران مقامی مینو فیکچرنگ، مقامی سپلائی چین کی اہمیت ہماری سمجھ میں آ گئی ہے۔ بحران کے وقت لوکل نے ہی ہمیں بچایا ہے۔ وقت نے سکھایا ہے کہ لوکل کو ہمیں اپنی خطِ زندگی بنانا ہے۔ آج سے ہر ہندوستانی کو ”لوکل“ کے لیے ”ووکل“ بننا ہے۔ نہ صرف لوکل پیداوار خریدنا ہے بلکہ اس کی فخر سے تشہیر بھی کرنا ہے ’۔ انہوں نے کہا کہ آج جو گلوبل برانڈ ہیں وہ بھی شروع میں لوکل ہی تھے۔ جب ان ملکوں کے افراد نے ان کا استعمال شروع کیا تو اسی دوران وہ گلوبل بن سکے۔ اپنے خطاب میں ملک کو خود کفیل بنانے کی اپیل کرتے ہوئے انہوں نے کہا کہ اس سے عالمی سپلائی چین میں شدید مقابلے کے لیے ملک تیار ہوگا۔
2لاکھ پی پی ای کٹ بن رہے ہیں:خود کفیل ہندوستان بنانے کی وکالت کرتے ہوئے انہوں نے کہا کہ جب ملک میں کورونا وائرس بحران شروع ہوا تھا تو ہم لوگوں کی حفاظت کے لئے ایک بھی پی پی ای کٹ نہیں بناتے تھے لیکن آج ہر روز دو لاکھ پی پی ای کٹ بنا رہے ہیں۔جب کورونا وائرس کا بحران شروع ہوا تھا تو ہم 95 نامی ماسک بھی بہت ہی کم بناتے تھے لیکن آج ہر روز ہم دو لاکھ ماسک بنا رہے ہیں۔ مودی نے یہ بھی کہا کہ ملک میں طویل عرصہ تک کوروناوائرس کو رہنا ہے لیکن ہم نے بحران کو بھی موقع میں تبدیل کر دیا اور خود کفیل ہوکر مصنوعات تیار کرنے لگے ہیں۔ انہوں نے کہا کہ ہمیں کورونا کے خلاف لڑنا ہے اور لڑتے ہوئے جینا ہے اور ماسک پہن کر رہنا ہے اور ملک کو خود کفیل بنانا ہے۔ انہوں نے کہا کہ ہمیں چوتھے لاک ڈاؤن کے شروع ہونے پر کچھ قوانین کے ساتھ ان پر عمل کرنا ضروری ہے اور ملک کی معیشت کو مضبوط بنانے کے لئے بھی کام کرنا ہو گا۔