نئی دہلی، 18/ستمبر (ایس او نیوز/ایجنسی) ’بھگوان وشوکرما‘ کے یوم پیدائش کے موقع پر ملک کے وزیراعظم نریندر مودی نے  اتوار کو پی ایم وشواکرما اسکیم کا اعلان  کیا، جس کے تعلق سے بتایا گیا ہے کہ اس اسکیم کے ذریعے دیہی اور شہری علاقوں کے کاریگروں کو مالی مدد فراہم کی جائے گی۔ بتایا گیا ہے کہ  اس منصوبہ کے تحت  روایتی دستکاری سے وابستہ لوگوں کو مدد فراہم کرنے پر توجہ مرکوز رکھی  جائے گی۔  وزیراعظم مودی کو توقع ہے کہ  اس اسکیم کے تحت نہ صرف دستکاروں اور کاریگروں کو مالی ا مداد  ملے گی، بلکہ یہ اسکیم  قدیم روایت، ثقافت اور متنوع ورثے کو زندہ رکھنے اور مقامی مصنوعات، فنون اور دستکاری کو فروغ  دینے کا  بھی ذریعہ  بنے گی۔

دہلی میں انٹر نیشنل کنونشن سینٹر کے افتتاح کے موقع پر اس اسکیم کا اعلان کرتے ہوئے وزیر اعظم  مودی نے کہا کہ پی ایم وشوکرما کو۱۳؍ ہزار کروڑ روپے کے اخراجات کے ساتھ مرکزی حکومت کی طرف سے مکمل طور پر فنڈ فراہم کیا جائے گا۔ اس اسکیم کے تحت بائیومیٹرک پر مبنی پی ایم وشوکرما پورٹل کا استعمال کرتے ہوئے کامن سروس سینٹرز کے ذریعے وشوکرما کی مفت رجسٹریشن کی جائے گی۔ انہیں پی ایم وشوکرما سرٹیفکیٹ اور شناختی کارڈ، بنیادی اور اعلیٰ تربیت سے متعلق اسکل اپ گریڈیشن 15 ہزار روپے کا ٹول کٹ انسینٹیو، ایک لاکھ روپے (پہلی قسط) اور2لاکھ روپے (دوسری قسط) رعایتی شرح سود پر فراہم کیے جائیں گے۔

وزیراعظم نے کہا کہ ’وشوکرما یوجنا‘ ہندوستان کی مقامی مصنوعات کو عالمی بنانے میں اہم کردار ادا کرے گی۔ جس طرح جسم میں ریڑھ کی ہڈی ہوتی ہے، اسی طرح وشوکرما (دستکار) سماجی زندگی میں اہم کردار ادا کرتے ہیں ۔ ان کے بغیر روزمرہ کی زندگی کا تصور کرنا مشکل ہے۔فریج کے دور میں بھی لوگ گھڑے کا پانی پسند کرتے ہیں ۔ وقت کا تقاضا ہے کہ ان ساتھیوں کو پہچان اور حمایت ملے۔ وزیر اعظم مودی نے کہاکہ وشوکرما یوجنا کے ذریعہ تمام کاریگروں کو تربیت دینے پر زور دیا گیا ہے۔ ٹریننگ کے دوران حکومت کی طرف سے ہر ایک کو500روپے یومیہ الاؤنس دیا جائے گا۔

انہوں نے کہا کہ جدید ٹول کٹ کے لیے15 ہزار روپے دیے جائیں گے۔ حکومت اشیا کی برانڈنگ میں بھی مدد کرے گی۔ اس کے بدلے میں حکومت چاہتی ہے کہ آپ صرف ان دکانوں سے سامان خریدیں جن کے پاس جی ایس ٹی رجسٹریشن ہے۔ مودی نے کہا کہ حکومت بغیر کسی گیارنٹی کے کاروبار شروع کرنے کیلئے رقم فراہم کرے گی۔۳؍ لاکھ روپے تک کا قرض بغیر کسی گیارنٹی کے دیا جائے گا اور اس کا سود بھی بہت کم ہوگا۔ نئے ٹولز خریدنے پر آپ کو پہلی بار ایک لاکھ روپے تک کا قرض ملے گا۔ اس کی ادائیگی کے بعد2لاکھ روپے کا قرض دیا جائے گا۔