چکمنگلور میں پٹرول ٹینکر اُلٹ گئی؛ دو زندہ جل کر ہلاک؛ کئی مکانوں میں آگ؛ سو میٹر تک آگ کے شعلے؛ مرنے والوں کی تعداد زائد ہونے کا خدشہ
بھٹکل 19/جون (ایس او نیوز)ریاست کرناٹک کے ضلع چکمنگلور کے کڈور تعلقہ کے گریا پور میں ہائی وے پر ایک پٹرول ٹینکر اُلٹ جانے کے نتیجے میں سو میٹر سے زائد رقبہ تک آگ پھیلنے کے ساتھ ساتھ کم ازکم دو لوگوں کے ہلاک ہونے کی اطلاع ملی ہے ۔ جبکہ ٹینکر پلٹتے ہی آگ لگنے سے قریب 15 مکانوں میں آگ لگ گئی ہے۔ میڈیا رپورٹ کے مطابق حادثے میں ٹینکر ڈرائیور اور ٹینکر کلینر دونوں زندہ جل کر ہلاک ہوگئے ہیں۔ جن کی شناخت فوری طور پر نہیں ہوسکی ہے۔کڈور میں موجود ساحل آن لائن کے ایک ذرائع نے بتایا کہ کلینر زندہ جل کر ہلاک ہونے کی خبر درست ہے ، البتہ ٹینکر ڈرائیور کے تعلق سے ایسی خبریں ہیں کہ وہ ٹینکر اُلٹتے ہی موقع واردات پر سے فرار ہوگیا ہے۔
ایک کنڑا ٹی وی نیوزچینل کے مطابق ایک ٹینکر دوسری ٹینکر کو اوورٹیک کرنے کی کوشش کررہی تھی جس کے نتیجے میں ایک ٹینکر اُلٹ گئی۔ رپورٹ کے مطابق ٹینکر اُلٹتے ہی ٹینکر میں آگ لگ گئی اور اتنی تیزی کے ساتھ پھیلی کہ قریب میں واقع پندرہ مکانوں کو بھی اپنی لپیٹ میں لے لیا۔ اس بات کا پتہ نہیں چل پایا ہے کہ جن مکانوں میں آگ لگی ہے، وہاں کے مکینوں کا کیا حال ہے۔ البتہ اس بات کا امکان ظاہر کیا گیا ہے کہ مکانوں میں موجود لوگ اگر فوری طور پر محفوظ مقامات کی طرف فرار ہونے میں کامیاب ہوئے ہیں تو وہ محفوظ ہوں گے، ورنہ مرنے والوں کی تعداد میں اضافہ بھی ممکن ہے۔ بتایا گیا ہے کہ ٹینکر کڈور سے ہوسا دُرگہ کی طرف جارہی تھی، ایک موڑ پر دوسری ٹینکر کو اوورٹیک کرنے کی کوشش میں ڈرائیور کا توازن بگڑ گیا۔ ٹینکر جیسے ہی اُلٹ کر گری، کچھ ہی دیر میں ٹینکر میں بھیانک آگ لگ گئی۔
بتایا گیا ہے کہ ٹینکر اُلٹ کر گرنے اور آگ لگنے کے وقفے کے درمیان دوسری ٹینکر معجزاتی طور پر وہاں سے دور نکل جانے میں کامیاب ہوگئی ، ورنہ آگ کے شعلے اُس تک پہنچتے تو نقصان مزید زیادہ ہونے کا اندیشہ تھا۔
رپورٹ کے مطابق حادثہ اعظم پور پولس تھانہ حدود میں آج منگل دوپہر قریب تین بجے پیش آیا۔ بتایا گیا ہے کہ آٹھ فائر بریگیڈ کی مدد سے آگ پر قابو پانے کی کوشش جاری ہے۔ ساحل آن لائن کے ذرائع کے مطابق پورے علاقہ کو پولس نے گھیر لیا ہے اور آگ اتنی بھیانک ہے کہ قریب جانا ممکن نہیں ہے، ذرائع کے مطابق اُن مکانوں تک پہنچنا بھی فی الحال ممکن نہیں ہے جو آگ کی لپیٹ میں آگئی ہیں۔