انکولہ میں ایک گھر کے کنویں میں نکلا پٹرول۔ قریبی پٹرول بنک کی ٹنکی میں خرابی کا شاخسانہ
انکولہ14/دسمبر (ایس او نیوز) انکولہ شہر میں واقع ایک گھر کے کنویں میں پٹرول پائے جانے کی اطلاع موصول ہوئی ہے جس کے بارے میں شبہ کیا جارہا ہے کہ گھر کے قریب واقع پٹرول بنک کی زیر زمین ٹنکی میں خرابی کی وجہ سے رساؤ شروع ہواہوگا اور وہ پٹرول گھر کے کنویں کے پانی میں شامل ہوگیا ہوگا۔
بتایاجاتا ہے کہ انکولہ میں کاروار روڈ پر واقع ناگوینی ناگراج اچاری کے گھروالے کنویں سے پٹرول کی بو آتی ہوئی محسوس کرکے حیران ہوگئے۔ پھر جب کنویں میں جھانک کر دیکھاتو پانی کی سطح پر پٹرول تیرتا ہوا دکھائی دیا۔ کنویں میں پٹرول پائے جانے کی اطلاع عام ہونے پر مشاہدہ کرنے کے لئے سیکڑوں لوگ ناگوینی اچاری کے گھر پہنچ گئے۔
گھر والوں نے بلدیہ چیف آفیسر کو اس بات کی تحریری اطلاع دی تو چیف آفیسر بی پرہلاد، سینئر ہیلتھ سپروائزر پروین نائک اور دیگر افسران نے موقع پر پہنچ کر معائنہ کیااور اس نتیجے پر پہنچے کہ قریب کے پٹرول بنک سے رساؤ کی وجہ سے کنویں کے پانی میں پٹرول شامل ہوگیا ہے۔
چیف آفیسر نے پٹرول بنک کے مالک کو نوٹس دیتے ہوئے ہدایت جاری کی ہے کہ پٹرول کی زیر زمین ٹنکی کو جلد ہی درست کروا نے کے علاوہ ناگوینی کے کنویں کا پانی نکال کر اسے صاف کروایا جائے اور کنویں کے پانی کو استعمال کے لائق بنانے کے لئے اقدامات کیے جائیں۔چیف آفیسر نے اس معاملے کی تفصیلات محکمہ فائر بریگیڈ اور دیگر متعلقہ محکمہ جات کو روانہ کردی ہے۔
