نئی دہلی؍ 26؍نومبر (ایس او نیوز/ایجینسیز) پٹرول اور ڈیزل کی قیمتوں میں  اضافہ رُکنے کا نام نہیں لے رہا ہے،  جمعرات سے ملک کے چار بڑے میٹروں شہروں میں پٹرول کی قیمتوں میں 11 پیسے اور ڈیزل کی قیمتوں میں 20 سے 22 پیسے فی لیٹر اضافہ کیا گیا ہے۔

سمجھا جارہا تھا کہ پٹرول اور ڈیزل کی قیمتوں میں مسلسل پانچ دنوں تک اضافے کے بعد بدھ کے روز دونوں ایندھن کی قیمتیں مستحکم رہیں گی  مگر ان پانچ دنوں میں ڈیزل 95 اور پٹرول 53 پیسے فی لیٹر مہنگا ہوگیا۔ 20 نومبر کو 48 دن تک مستحکم رہنے کے بعد پہلی بار دونوں ایندھن کی قیمتوں میں اضافہ کیا گیا ہے۔ 

ذرائع سے ملی اطلاع کے مطابق دہلی میں پٹرول 81.70 روپے فی لیٹر جبکہ ڈیزل 71.62 روپے فی لیٹر ، ممبئی میں پٹرول 88.40 روپے اور ڈیزل 78.12 روپے ، کولکتہ میں پٹرول 83.26 روپے اور ڈیزل 75.19 روپے جبکہ چنئی میں پٹرول 84.74 روپے فی لیٹر اور ڈیزل 77.08 روپے فی لیٹر فروخت ہورہاہے۔