کاروار،22؍اکتوبر(ایس او نیوز) کاروار انسٹی ٹیوٹ آف میڈیکل سائنسس کے تحت شروع کیے گئے میڈیکل کالج میں  تعلیمی سال 2020-21 کے لئے 150طلبہ کو داخل کرنے کی اجازت نیشنل میڈیکل کمیشن(سابقہ نام: میڈیکل کاونسل آف انڈیا) کی جانب سے مل گئی ہے۔ 

اس بات کی اطلاع دیتے ہوئے  کاروار انسٹی ٹیوٹ آف میڈیکل سائنسس کے ڈائریکٹر اور ڈین ڈاکٹر گجانن نائیک نے بتایا کہ  اس سے قبل میڈیکل کاونسل آف انڈیا کی ایک ٹیم نے کاروار پہنچ کر یہاں میڈیکل کالج میں تعلیم شروع کرنے کے لئے ضروری انتظامات اور سہولتوں کا جائزہ لیا تھا اور بعض معاملات کو درست کرنے کی ہدایات دی تھیں۔ پھر  ۱۵ستمبرکو ویڈیو کانفرنس کے ذریعے دوبارہ جائزہ لینے اور سابقہ ہدایات پر عمل آوری کو دیکھنے کے بعد اس کالج میں ایم بی بی ایس کے لئے پہلے بیاچ کے لئے داخلہ شروع کرنے کی اجازت دے دی گئی ہے۔

ڈاکٹر گجانن نائیک نے کالج میں داخلہ شروع کرنے کی اجازت ملنے پر اس معاملے میں تعاون فراہم کرنے کے لئےمیڈیکل ایجوکیشن  کے وزیر، سیکریٹری، ڈائریکٹرکے علاوہ ضلع انچارج وزیر ، مقامی ایم ایل اےاورضلع ڈپٹی کمشنرکا شکریہ ادا کیا ہے۔