لوگ ریاست اور مرکز میں اقتدار کی تبدیلی چاہتے ہیں:چدمبرم
شیوگنگا، 18 اپریل (یواین آئی) کانگریس کے سینئر لیڈر اور سابق مرکزی وزیر پی چدمبرم نے جمعرات کو کہا کہ تمل ناڈو کے لوگ مرکزی اور ریاستی دونوں جگہ اقتدار میں تبدیلی چاہتے ہیں۔مسٹر چدمبرم نے شیوگنگا لوک سبھا حلقہ میں ووٹ ڈالنے کے بعد نامہ نگاروں سے کہاکہ تمل ناڈو کے عوام مرکز اور ریاست میں حکومت میں تبدیلی چاہتے ہیں. اسی وجہ سے کانگریس، ڈی ایم کے اور دیگر اتحادیوں کی طرف سے قائم سیکولر پروگریسو مورچہ کو لوگوں کی جانب سے اتنی بھرپور حمایت مل رہی ہے ’’۔اس علاقے سے کانگریس کے ٹکٹ پر چدمبرم کے بیٹے کارتک چدمبرم بھارتیہ جنتا پارٹی کے قومی جنرل سکریٹری ایچ راجہ کو چیلنج کر رہے ہیں۔سابق وزیر نے کہاکہ ہمیں اپنی خودمختاری کا تحفظ کرنا ہوگا. ہمارا خیال ہے کہ تمام مذاہب یکساں ہیں اور قانون کے سامنے ہر شخص ایک جیسا ہے . مجھے یقین ہے کہ سکیولر پروگریسو مورچہ لوک سبھا انتخابات میں کامیابی حاصل کرے گا۔ سکیولر پروگریسو مورچہ کی تشکیل سب سے پہلے 1971 میں ہوئی تھی اور اس کے بعد سے ہر بار اس محاذ کی تشکیل کی گئی۔سکیولر پروگریسو مورچہ نے 1971، 1980، 1996، 1998، 2004اور 2009کے لوک سبھا انتخابات میں فتح حاصل کی تھی۔ چدمبرم نے کہا کہ انہوں نے سکیولر پروگریسو مورچہ کے حق میں ووٹ دیا ہے اور اس الیکشن میں اس کی فتح ہو گی۔ انہوں نے لوگوں سے محاذ کے حق میں ووٹ کرنے کی اپیل کی۔