کارکلا میں بادلوں کے طوفان نے مچائی تباہی۔ مکانات کی اڑگئیں چھتیں۔ درخت اور بجلی کے کھمبے زمین سے اکھڑ گئے
کارکلا یکم / اگست (ایس او نیوز) تعلقہ کے ناکرے علاقے میں عوام اس وقت خوف و دہشت میں مبتلا ہوگئے جب اچانک کالے بادلوں نے پانی برسانے کے بجائے گئے طوفان کھڑا کردیا۔
موصولہ رپورٹ کے مطابق یکم اگست کی صبح پونے نو بجے ناکرے میں آسمان پر اچانک گہرے سیاہ بادل جمع ہونے لگے۔ لوگوں نے سوچا کہ اب تھوڑی دیر میں بڑی تیز برسات ہوگئی۔ مگر دیکھتے ہی دیکھتے ماحول میں اچانک ایک عجیب کیفیت پیدا ہوگئی اور بادلوں نے طوفان مچادیا اور تیز ہوائیں چلنے لگیں جس کی زد میں آکر تقریباً دس مکانات کی چھتیں اڑ گئیں۔ کٹہل (پھنس/جیاک فروٹ)اور آم کے بڑے بڑے درخت زمین سے اکھڑ گئے۔ سپاری، کیلے کے باغ جو فصل کاٹنے کے لئے تیار تھے وہاں پر درخت زمین بوس ہوگئے۔کئی مقامات پر بجلی کے کھمبے ٹوٹ کر گرگئے۔تاریخی مہالنگیشور مندر سے متصل مونپا نامی شخص کا مکان اس طوفان کی وجہ سے بری طرح متاثر ہوا ہے۔
اس غیر متوقع آفت کی خبر ملنے پر ریوینیو افسران نے متاثرہ علاقے میں پہنچ کر حالات کا جائزہ لیا۔ ولیج اکاؤنٹنٹ شیواپرساد نے ابتدائی معائنے کے بعدنقصانات کا اندازہ 10لاکھ روپے لگایا ہے۔