جموں،27/ مئی (ایس او نیوز/آئی این ایس انڈیا) بی جے پی کی جموں و کشمیر یونٹ نے دعوی کیا کہ جموں اور لداخ علاقوں کے لوگ پارٹی کو ووٹ دے کر جلد سے جلد آئین کے آرٹیکل 370 اور 35 اے کو ہٹوانا چاہتے ہیں۔پارٹی نے یہ بھی کہا کہ اسمبلی انتخابات کے بعد اپنے طور پر ریاست میں حکومت بنانے کا نیشنل کانفرنس کا دعوی کھوکھلا ہے۔بی جے پی نے حال ہی میں اختتام ہوئے لوک سبھا انتخابات میں ریاست کی اودھم پور، جموں اور لداخ نشست پر جیت درج کی ہے جبکہ کشمیر وادی کی تینوں نشستوں سرینگر، بارہمولہ اور اننت ناگ سیٹوں پر نیشنل کانفرنس کو کامیابی ملی تھی۔نیشنل کانفرنس کے صدر فاروق عبداللہ نے جمعہ کو کہا تھا کہ وزیر اعظم وسیع اکثریت کے باوجود آرٹیکل 35 اے اور 370 نہیں ہٹا سکتے۔اس پر بی جے پی کی ریاستی یونٹ کے ترجمان بریگیڈیئر (ریٹائرڈ) انل گپتا نے کہاکہ عبداللہ اور نیشنل کانفرنس کی قیادت کے پاس آرٹیکل 35 اے اور 370 کو لے کر بڑے بڑے دعوے کرنے کے لئے جموں اور لداخ کا مینڈیٹ نہیں ہے کیونکہ ان دونوں علاقوں کے لوگ اس آرٹیکل کو جلد سے جلد ہٹوانا چاہتے ہیں۔