پٹنہ 17 ستمبر (ایس او نیوز) امت شاہ کے ذریعہ لالو پرساد یادو اور نتیش کمار پر کیے گئے زبانی حملے پر سخت  جواب دیتے ہوئے بہار کی سابق وزیر اعلیٰ رابڑی دیوی نے  کہا کہ ملک میں کتنے ہی  مودی آئیں گے اور چلے جائیں گے، البتہ اِس بار بہار کے عوام  ان کو  جواب دے گی۔ رابڑی دیوی نے سوال کیا کہ کیا پورے ملک کے لوگ ان کی مٹھی میں ہیں؟ رابڑی نے یہ بھی  کہا کہ یہ لوگ عوام کو صرف جھوٹے بھروسے اور جھوٹے اعلانات سے   ہی رجھاسکتے ہیں،  ورنہ یہ لوگ نہ  روزگار دے سکتے ہیں  اور نہ ہی  مہنگائی پر قابوپاسکتے ہیں۔ آگے کہا کہ اب بہار کی عوام  ہی ان کو سخت جواب دے گی۔

رابڑی دیوی نے کہا کہ ملک میں لڑائی جھگڑا اور دنگے  ہو رہے ہیں، کشمیر میں قتل عام جاری  ہے۔ رابڑی نے سوال کیا کہ  کشمیر میں اب تک  انتخاب کیوں نہیں کرائے گئے؟ ہمت ہے تو جموں و کشمیر میں انتخاب کراکر دکھائیں۔آگے کہا کہ  مودی حکومت کو  خوف  ہے اسی لئے  کشمیر میں  انتخابات نہیں کرائے جا رہے  ہیں۔ انہوں نے منی پور میں تشدد کے واقعات پر بھی سوال اُٹھایا اور پوچھا کہ اب تک منی پور میں ہورہے دنگے کو روکنے میں بی جے پی کی ڈبل انجن حکومت ناکام کیوں ہے ؟