اے پی حکومت کو دارالحکومت امراوتی کی منتقلی کا کوئی اختیار نہیں: پون کلیان
حیدرآباد،16/فروری (ایس او نیوز/یو این آئی) جنا سینا پارٹی کے سربراہ و تلگو فلموں کے مشہور اداکار پون کلیان نے دعوی کیا ہے کہ اے پی کے دارالحکومت امراوتی کی منتقلی کا ریاستی حکومت کو کوئی اختیار نہیں ہے۔
انہوں نے سنیچر کے روز دارالحکومت امراوتی کے دیہاتوں کرشنیاپالیم، ایرابالیم میں مقامی افراد سے ملاقات کی جو دارالحکومت کو منتقل کرنے اور ریاست میں تین دارالحکومتوں کے قیام کے لئے حکومت کے اقدام کے مخالف ہیں۔
اس موقع پر پون کلیان نے کہا کہ امراوتی کو دارالحکومت بنانے کافیصلہ پیشرو حکومت نے کیا تھااور اب اس دارالحکومت کو منتقل کرنے کا حق موجودہ حکومت کو نہیں ہے۔انہوں نے کہاکہ جب اُس وقت کی تلگودیشم حکومت نے یہ فیصلہ کیا تھا تو اپوزیشن جماعت وائی ایس آرکانگریس نے اس پر رضامندی ظاہر کی تھی۔
انہوں نے کہاکہ وہ کسانوں سے ملاقات اور ان کے مسائل سے واقفیت کے لئے آئے ہیں۔انہوں نے کہاکہ جلد ہی وہ اس مسئلہ پر ریلی منعقد کریں گے۔ انہوں نے دعوی کیا کہ بی جے پی کے سرکردہ لیڈروں نے کہا ہے کہ امراوتی کے کسانوں کی حمایت کی جائے گی اور کسی بھی صورت میں کسانوں سے ناانصافی ہونے نہیں دی جائے گی۔