بنگلورو،3؍دسمبر(ایس او نیوز) بنگلورو دیہی لوکل باڈیز حلقے سے ریاستی قانون ساز کونسل کیلئے ہورہے انتخابات کو جے ڈی ایس پارٹی نے سنجیدگی سے لیاہے اور اس انتخابات میں پارٹی امیدواروں کوکامیاب کرکے پارٹی کارکنوں کو اپنی طاقت کا مظاہرہ کرناہوگا۔یہ بات رکن اسمبلی انیتاکمار سوامی نے کہی۔

انہوں نے یہاں بڈدی کے قریب کیت گانہلی میں منعقدہ اجلاس سے خطاب کرتے ہوئے کہاکہ اس انتخابات میں جے ڈی ایس امیدواروں کے انتخاب کا فیصلہ پارٹی کے سرکردہ قائدین کی طرف سے کیاگیاہے۔سابق وزیر اعظم اور سابق وزیراعلیٰ کمار سوامی ہی انتخابات میں امیدوار ہیں یہ سمجھ کر کارکنوں کو متحد ہوکر کام کرناہوگا۔آئندہ اسمبلی انتخابات کو ذہن میں رکھ کر قانون ساز کونسل انتخابات میں پارٹی امیدواروں کو کامیاب بناناہوگا۔ضلع کے چاروں اسمبلی حلقوں میں کامیابی کیلئے قانون ساز کونسل کے انتخابات میں پارٹی امیدواروں کی کامیابی ضروری ہے۔

انیتاکمارسوامی نے کہا کہ کے پی سی سی صدر کے آبائی گاؤں میں بھی جے ڈی ایس پارٹی کی پوزیشن مضبوط ہے،وہاں کے مقامی بلدیاتی اداروں میں بھی جے ڈی ایس پارٹی کے امیدواروں نے کامیابی حاصل کی ہے۔انہوں نے کہا کہ 1994 میں خواتین کو ریزرویشن فراہم کرنے کیلئے دیوے گوڈانے جدوجہد کی تھی،جس کے سبب آج مقامی بلدیاتی اداروں میں خواتین کی تعداد زیادہ ہے۔