شموگہ اور چکمنگلورسمیت کئی علاقوں میں دھماکے دار آواز کے ساتھ زمین تھرّا اُٹھی؛ کیا یہ زلزلہ تھا یا ؟
بھٹکل 21 جنوری (ایس او نیوز) پڑوسی ضلع شموگہ اور چکمنگلور میں رات قریب 10:25 بجے دھماکے دار آواز کے ساتھ زمین تھرّا نے کی اطلاع موصول ہوئی ہے جس سے عوام میں شدید خوف وہراس کی لہر پیدا ہوگئی اور لوگ گھروں اور عمارتوں سے باہر نکل آئے۔
شموگہ سے ذرائع نے بتایا کہ کسی طرح کا دھماکہ ہونے کی آواز کے ساتھ زمین میں کپکپاہٹ پیدا ہوگئی تھی جس کے نتیجے میں کئی مکانوں کی چھتوں کو نقصان پہنچا، کئی مکانوں کی کھڑکیوں کے شیشے ٹوٹ کر گرگئے، گھروں کے باہر پارک کی ہوئی سواریوں کے گلاس ٹوٹ گئے ، البتہ زائد نقصان کی کوئی اطلاع دیر رات تک موصول نہیں ہوئی۔
زمین ہلنے کے ساتھ ہی لوگوں کو لگا کہ زلزلہ آیا ہے، اس لئے لوگ مارے خوف کے گھروں سے باہر نکل آئے، مگر ابھی تک اس بات کی تصدیق نہیں ہوئی کہ آیا چھوٹے پیمانے کا زلزلہ آیا تھا یا زلزلے کا جھٹکا تھا یا پھر کچھ اور تھا۔
اس تعلق سے بعض ماہرین نے خیال ظاہر کیا ہے کہ یہ زلزلہ نہیں تھا بلکہ آسمان میں دو ستارے آپس میں ٹکرانے سے ایسا ہوا تھا۔ ماہرین کا کہنا ہے کہ آسمان میں دمدار ستارے اکثر ایک دوسرے سے ٹکراتے رہتے ہیں جس سے روشنی پیدا ہوتی ہے ، چونکہ یہ ٹکراو آسمان پر کافی بلندی پر ہوتی ہے، اس لئے آواز نیچے تک نہیں پہنچ پاتی، مگر اس بار روشنی کے ساتھ ساتھ ٹکرانے کی دھماکے دار آواز بھی سنائی دی ہے۔ ماہرین کا کہنا ہے کہ ایسا ممکن ہے کہ اس بار کافی بڑا دمدار ستارہ دوسرے ستارہ سے ٹکڑا گیا ہو یا یہ ستارے کافی نیچے آکر ٹکرائے ہوں جس کے نتیجے میں آواز سنائی دی اور دھماکے دار آواز سے زمین بھی تھرّا اُٹھی۔ فی الحال ماہرین جانچ میں لگے ہوئے ہیں اور حتمی فیصلے تک نہیں پہنچ پائے ہیں۔
اس دوران سوشیل میڈیا پر شموگہ کے ہونسوڑ میں ایک ڈائنامیڈ سے بھری لاری میں دھماکہ ہونے کی خبر بھی سامنے آرہی ہے اور ایسا بھی کہا جارہا ہے کہ اسی دھماکے سے زمین تھّرا اُٹھی تھی، بتایا جارہا ہے کہ لاری میں دھماکہ ہونے سے بہارسے تعلق رکھنے والے 15 مزدوروں کی موت بھی واقع ہوئی ہے، مگر اس بات کی بھی تصدیق ہونی ابھی باقی ہے۔
بتایا جارہا ہے کہ آواز کے ساتھ زمین کی کپکپاہٹ ضلع اُترکنڑا کے سداپور میں بھی محسوس کی گئی ہے۔