بیڑ،20/جون (ایس او نیوز/ آئی این ایس انڈیا) مہاراشٹر کے بیڑ ضلع میں گزشتہ تین سال میں 4605 خواتین کی بچہ دانی نکالی گئی۔ وزیر صحت ایکناتھ شندے نے منگل کو اسمبلی میں اس کی اطلاع دی۔ شندے نے بتایا کہ وزارت صحت کے چیف سکریٹری کی صدارت میں قائم ایک کمیٹی اس معاملہ کی تفتیش کرے گی۔شیوسینا ممبر اسمبلی گورہے نے قانون ساز کونسل میں یہ مسئلہ اٹھاتے ہوئے کہا کہ بیڑ ضلع میں گنے کے کھیت میں کام کرنے والی خواتین کی بچہ دانی نکالی گئی،تاکہ حیض کے باعث ان کے کام میں رکاوٹ نہ آئے۔چیف سکریٹری قیادت والی کمیٹی میں 3ماہر امراضِ خواتین اور بعض خواتین رکن اسمبلی ہوں گی۔ کمیٹی دو ماہ میں اپنی رپورٹ پیش کرے گی۔ ریاستی حکومت نے تمام ڈاکٹروں کو حکم دیا تھا کہ وہ غیر ضروری طور پر بچہ دانی نہ ہٹا دیں۔ قومی خواتین کمیشن نے اپریل میں اس معاملے کے سامنے آنے کے بعد ریاست کے چیف سکریٹری کو نوٹس جاری کیا تھا۔