پال گھر:سادھوؤں کے قتل کی سی بی آئی یا این آئی اے جانچ کی درخواست پر سپریم کورٹ میں سماعت ملتوی
نئی دہلی،23؍نومبر(ایس او نیوز؍آئی این ایس انڈیا) پال گھر دوسادھوؤں کے قتل سے متعلق سی بی آئی یا این آئی اے جانچ درخواست پرپیر کو سپریم کورٹ میں سماعت ملتوی ہوگئی۔ آئندہ ہفتے اس معاملے کی سماعت سپریم کورٹ میں ہوگی۔
سپریم کورٹ میں سالیسٹر جنرل تشار مہتا نے مطالبہ کیا کہ اس کیس کو موخر کیا جائے۔ واضح رہے کہ گذشتہ سماعت میں مہاراشٹرا حکومت نے سپریم کورٹ کو بتایا تھا کہ تمام قصوروار پولیس افسران کو سزا دی گئی ہے یا خدمات سے معطل کردیا گیا ہے۔
مہاراشٹر پولیس نے سپریم کورٹ میں ایک حلف نامہ داخل کیا ہے۔ مہاراشٹرا پولیس نے سی بی آئی تحقیقات کے مطالبے کی مخالفت کی ہے۔ پولیس نے کہا ہے کہ درخواست خارج کرنے کے ساتھ ہی درخواست گزار پر بھی جرمانہ عائد کیا جانا چاہئے۔
ریاستی سی آئی ڈی مکمل تحقیقات کے بعد پہلے ہی دو چارج شیٹ داخل کرچکی ہے۔ یہ چارج شیٹ عدالت میں بھی دائر کی گئیں ہیں۔ ان پولیس اہلکاروں کے خلاف محکمانہ انکوائری کی گئی جو اپنی ذمہ داری میں لاپرواہ پائے گئے۔
اسسٹنٹ پولیس انسپکٹر آنندرا شیوجی کالے جو محکمانہ انکوائری میں قصوروار پائے گئے تھے ان کو ملازمت سے برطرف کردیا گیا ہے۔ اس کے علاوہ اسسٹنٹ پولیس سب انسپکٹر رویندرا دنکر سالونکے اور ہیڈ کانسٹیبل نریش دھونڈی کو لازمی ریٹائرمنٹ دی گئی ہے۔
اس کے علاوہ لاپرواہی کے مرتکب 15 دیگر پولیس اہلکاروں کو بھی دو، تین سال کی تنخواہ نصف دینے کے طور پر سزا دی گئی ہے۔دراصل سپریم کورٹ میں ایک درخواست دائر کی گئی ہے جس میں اس کیس کو سی بی آئی میں منتقل کرنے کا مطالبہ کیا گیا ہے۔
گذشتہ سماعت میں سپریم کورٹ نے مہاراشٹر پولیس سے تفتیش کی تھی اور کہا تھا کہ غفلت برتنے والے پولیس اہلکاروں کے خلاف کیا کارروائی کی گئی ہے؟ نیز اس کیس میں دائر چارج شیٹ کو عدالت کے روبرو پیش کرنے کو کہا گیا تھا۔