پارلیمنٹ میں وزیر خارجہ جے شنکرنے کہا،بے قصور ہے کلبھوشن جادھو، رہا کرے پاکستان
نئی دہلی، 18 جولائی(ایس او نیوز/آئی این ایس انڈیا) پاکستان کی جیل میں قید ہندوستانی شہری کلبھوشن جادھو کے معاملے میں بین الاقوامی عدالت (آئی سی جے) کے فیصلے کے بعد آج (جمعرات) وزیر خارجہ ایس جے شنکر نے پارلیمنٹ میں بیان دیا۔وزیر خارجہ ایس جے شنکر نے کہا کہ آئی سی جے نے ہندوستان کے اس دعوے کو صحیح ٹھہرایا کہ پاکستان بہت سے معاملات میں ویانا کنونشن کی خلاف ورزی کر رہا ہے۔انہوں نے کہا کہ ہم ایک بار پھر پاکستان سے کلبھوشن جادھو کو رہا کرنے اور واپس بھیجنے کا مطالبہ کر رہے ہیں۔وزارت خارجہ کی جانب سے جاری بیان میں کہا گیا کہ کلبھوشن جادھو کی جلد رہائی اور ہندوستان واپسی کی کوشش جاری رکھیں گے۔بتا دیں کہ بین الاقوامی عدالت نے کلبھوشن جادھو کی پھانسی پر روک لگاتے ہوئے پاکستان کو اس معاملے پر نظر ثانی کرنے کے لئے کہا ہے۔کلبھوشن جادھو کے معاملے میں آئی سی جے کی جانب سے ہندوستان کے حق میں سنائے گئے فیصلے کا اپوزیشن سمیت پورے ملک نے خیر مقدم کیا۔سابق وزیر خارجہ سشما سوراج نے بین الاقوامی عدالت میں اس کیس کو مؤثر طریقے سے پیش کرنے والے ہریش سالوے کا شکریہ کرتے ہوئے اسے ملک کی عظیم فتح بتایا۔غور طلب ہے کہ کلبھوشن جادھو کو پاکستان کے خلاف جاسوسی اور سازش کے الزام میں موت کی سزا سنائی گئی تھی۔آئی سی جے نے اپنے حکم میں پاکستان کو جادھو کو پھانسی نہ دینے کی ہدایت دیتے ہوئے اس فیصلے پر دوبارہ غور کرنے کو کہا ہے۔